Tvar biełaruskaha biznesu
U Niamieččynie pa-raniejšamu znachodzicca pad vartaj biełaruskaja biznesoŭka Natalla Šaŭko (Sudlankova), kolišniaja prezydentka kampanii “Fiko”.
N.Šaŭko prachodziła pa spravie kradziažu kredytaŭ Nacbanku, jakija ŭ siaredzinie 1990-ch praz “Biełahraprambank” atrymali niekalki biełaruskich kamercyjnych firmaŭ. Na sumu ŭ 4 miljony dalaraŭ pavinna było być zakuplenaje zbožža, ale, jak śćviardžali paśla śledčyja, bolšaja častka hrošaj (jak minimum 3 miljony dalaraŭ) była pieraviedzienaja za miažu firmami “Ras”, “Kazahraservis” i “Puše-Ahra”. Šaŭko abvinavacili ŭ tym, što jana, majučy suviazi va ŭładzie, “vybiła” hetyja kredyty. Pa inšych źviestkach, jana i jaje firma “Fiko” nia maje da hetaj spravy nijakich adnosinaŭ, a kredytaŭ damohsia Alaksandar Pupiejka, prezydent “Puše”, jaki ciapier žyvie ŭ Polščy.
U 2001 h. pravaachoŭnyja orhany Biełarusi ŭpieršyniu źviarnulisia da ŭładaŭ Čechii ŭ spravie Šaŭko, jakaja atrymała tam u śniežni 1999-ha palityčny prytułak. Miensk patrabavaŭ ekstradycyi biełaruski na radzimu, vinavaciačy jaje ŭ “finansavych machinacyjach, kradziažy srodkaŭ i złoŭžyvańni słužbovym stanoviščam”. Ale česki sud, u materyjałach jakoha Natalla prachodzić jak “dysydentka”, vyrašyŭ jaje nie vydavać.
Jak paviedamlaje ahiencva BiełaPAN, śledčyja prakuratury Biełarusi rychtujuć dakumenty na N.Šaŭko, jakija ŭ najbližejšy čas buduć nakiravanyja pravaachoŭnym orhanam Niamieččyny. Kiraŭnik biełaruskaj słužby radyjo “Svaboda” Alaksandar Łukašuk u hutarcy z karespandentam “NN” vykazaŭ spadziavańnie, što sud adbudziecca na praciahu tydnia i Natalla budzie vyzvalenaja.
Nahadajem, što ŭ Prazie N.Šaŭko supracoŭničała ź biełaruskaj słužbaj radyjo “Svaboda”, vydavała miascovuju rasiejskamoŭnuju hazetu. Pisała i ŭ mienskija hazety. Tak, u červieńskim dadatku da “BDH” “Dla słužiebnoho polzovanija” jana nadrukavała vialikaje interviju z byłym pamočnikam prezydenta Čačenii, a ciapier palitemihrantam Baudzinam Kadzijevym.
Ale ŭ Biełarusi jana bolej zapomniłasia jak vydatnaja biznes-vumen, fundatarka kulturnickich i vydavieckich prajektaŭ (naprykład, časopisu “Unija”). Hetaja pryhožaja žančyna była tvaram biełaruskaha nacyjanalnaha biznesu, jaki pavoli naradžaŭsia ŭ pačatku 90-ch, ale byŭ razahnany ŭ pieršyja hady praŭleńnia Łukašenki. Natalla zmušanaja była ŭciakać z krainy, jakuju mocna lubiła j lubić, u jakuju, napeŭna, jašče kaliści vierniecca. Tolki heta budzie ŭžo inšaja kraina i inšaja Natalla Šaŭko.
Aleh Tačony
«Jana daŭnavata ŭ Biełarusi». Baćka Anžaliki Mielnikavaj pryznaŭsia, što jana žyvaja i zdarovaja90
Kamientary