ekanamičnaja chronika

Źnizilisia pakupki valuty...500 haspadarak biez zarobku...Nacbank rekamenduje...Novaja banknota...Eŭračyp ad “Biełtelekamu”...Padatkaniapłatnik...Haz, elektryka padaraželi...

Źnizilisia pakupki valuty

U kastryčniku biełarusy štodzień kuplali ŭ abmiennych punktach 5,7 miljona dalaraŭ. Heta na 9,5% mieniej, čym u siarednim za studzień—vierasień. Źnižeńnie moža być źviazanaje z pavyšeńniem papularnaści aščadžeńniaŭ u biełaruskich rublach u suviazi sa źnižeńniem inflacyi i sa źmianšeńniem kolkaści volnych hrošaj u ludziej u vyniku rezkaha rostu kamunalnych vypłataŭ.

500 haspadarak biez zarobku

Pałata pradstaŭnikoŭ pryniała zakon pra rearhanizacyju sielhaspradpryjemstvaŭ. Stratnyja kałhasy dy saŭhasy, jakich u krainie bolš za 1400, buduć źlivać z bahaciejšymi, dzialić, pieraŭtvarać u akcyjanernyja tavarystvy i h.d. Bo 500 haspadarak nia majuć hrošaj navat kab płacić zarobki. Hałoŭnuju rolu ŭ rearhanizacyi budzie adyhryvać miascovaja ułada. Značyć, biznesoŭcy zmohuć naviazvać joj svaje scenary, jak heta było ŭ vypadku “Biełavieskaj charčovaj kampanii”.

Nacbank rekamenduje

Nacbank raić bankam źnizić adsotkavyja staŭki pa kredytach. Zvyčajna takoje robiać, kab “ažyvić” ekanomiku, pryciahnuć investycyi dy pašyryć vytvorčaść. Heta drenna adabjecca na rentabelnaści bankaŭ. Kab uratavać sytuacyju, jany buduć zmušanyja źmienšyć aperacyjnyja vydatki — h.zn. skaracić persanał, admovicca ad małaprybytkovych vidaŭ dziejnaści.

Novaja banknota

50 tys. rubloŭ — hetki naminał budzie mieć novaja banknota, jakuju ŭviaduć u zvarot 20 śniežnia. Jana budzie ciomna-biruzovaja, z vyjavaj Mirskaha zamku. Banknota maje novy element abarony ad padrobak — nievialikuju razetku, jakaja źmianiaje koler ad załacistaha da zialonaha, kali jaje razhladać pad roznymi vuhłami.

Eŭračyp ad “Biełtelekamu”

“Biełtelekam” skončyŭ madernizacyju taksafonaŭ u krainie — ciapier “universalnymi” telefonnymi kartkami možna budzie karystacca paŭsiudna. Sa zvyčajnaha taksafonu — telefanavać pa miascovaj suviazi, a z universalnaha — choć za mora. Na kartkach ustalavany “eŭračyp”. Tut “Biełtelekam” abahnaŭ navat systemu kredytnych plastykavych kartak “Visa”, jakaja pakul karystajecca tradycyjnaj mahnitnaj pałasoj. Staryja kartki na 120 chvilinaŭ buduć skasavanyja naleta ŭ vieraśni.

Padatkaniapłatnik

Dyrektara mienskaha UP “Kansikiej” vinavaciać u tym, što letaś jahonaje pradpryjemstva ad 20 červienia da 31 žniŭnia nia spłačvała padatki dy nie adličvała hrošaj u pazabiudžetnyja fondy. Dziaržava spahaniaje z dyrektara 857,5 młn. rubloŭ (kala 460 tys. dalaraŭ).

Haz, elektryka padaraželi

U 2,46 razu pabolšała cana hazu, kali paraŭnoŭvać sa studzieńskimi koštami. Dla tych, chto maje hazavyja ličylniki dy hazavaje aciapleńnie, jana vyrasła ad 50,23 da 79,5 rub. (za 1 m3) u aciaplalny peryjad i ad 59,5 da 103 rub. uletku. Tyja, u kaho niama ličylnikaŭ, ale jość hazavyja plity j haračaja vada, majuć płacić 825 rub. na čałavieka ŭ miesiac zamiest 476. Haz “u balonach” budzie kaštavać 275 rub. za 1 m3 (raniej było 160,6).

A.K.

• 0
• 0
• 0
• 0
• 0
• 0
• 0
• 0