Kvotnyja prablemy «Biellehpramu»

Kiraŭnictva kancernu «Biellehpram» u šoku. Urad maje namier admovicca ad dziaržzamovy na pradukcyju lohkaj pramysłovaści

Pavodle prajektu, užo sioleta buduć całkam skasavanyja kvoty na zakup šviejnych, harsetnych, dyvanovych dy amal usich astatnich najmieńniaŭ pradukcyi «Biellehpramu». Dziaržzamova zastaniecca tolki na niekatoryja vidy dziciačaha trykatažu dy abutku, a taksama pančochaŭ dy škarpetak.

U «Biełkaapsajuzie» patłumačyli, što kvoty, z adnaho boku, dyscyplinujuć pradpryjemstvy, ale, ź inšaha, nie dajuć im voli. Kvoty abaviazvajuć handlovyja pradpryjemstvy pa ŭsioj krainie zakuplać peŭny abjom pradkucyi «Biellehpramu». Adnak płaciežazdolnaść nasielnictva źmianiajecca, a kvoty na praciahu hodu zastajucca adnolkavymi. I taja arhanizacyja, jakaja na pačatku hodu mahła realizavać naviazanuju joj pradukcyju, praź niekalki miesiacaŭ užo nia moža «vybrać kvotu». I pradpryjemstva niasie straty.

Prezydent «Biellehpramu» Eduard Naryškin nazvaŭ prajekt «biesprecedentnym łabiravańniem niečych zamiežnych intaresaŭ». Jon ličyć, što dziaržava musić, naadvarot, padvysić kvoty na zakup vyrabaŭ pradpryjemstva, bo spažyviecki popyt padaje — značycca, treba padtrymlivać svaich vytvorcaŭ.

Z ulikam abaviazkovych kvotaŭ, dola pradukcyi lohkaj pramysłovaści, jakuju vypuskajuć pradpryjemstvy kancernu, składaje na ŭnutranym rynku 28—38%. Eduard Naryškin ličyć, što ŭ ideale hetaja ličba pavinna być roŭnaj 50%, adnak skasavańnie kvotaŭ nieminuča źmienšyć abjomy prodažu.

U hety čas ZŠA praciahvajuć baranicca ad zavialikaha abjomu pastavak pradukcyi «Biellehpramu» ŭ krainu. 10 studzienia ŭ Vašynhtonie byŭ padpisany biełaruska-amerykanski memarandum pra pastaŭki na amerykanski rynak pradukcyi naftachimičnaj i lohkaj pramysłovaści Biełarusi. Jon praduhledžvaje abmiežavańni na prodaž biełaruskaha trykatažu na amerykanskim rynku. Sioleta kancern moža pastavić u ZŠA nia bolš za 408 tys. žanočych nahavicaŭ dy nia bolš za 792 tys. palito z voŭny.

Amerykancy ŭviali abmiežavańni paśla taho, jak pastaŭki biełaruskaha trykatažu na amerykanski rynak pieravysili rasiejskija (kvoty dla Rasiei byli ŭviedzienyja jašče ŭ 1998 h.) Adnak «Biellehpram», jaki pracuje bolš čym z 20 amerykanskimi firmami, kvoty nia duža zasmucili: amerykancy ž nie vyciaśniajuć biełaruskaj pradukcyi z krainy, a tolki namahajucca paźbiehnuć ekspansii našaha trykatažu. Pamier kvotaŭ nia mienšy za letašnija abjomy pastavak pradukcyi «Biellehpramu» ŭ Ameryku — značycca, sioleta ekspart možna budzie navat pavialičyć.

Isnujuć abmiežavańni i na pastaŭki pradukcyi «Biellehpramu» ŭ krainy Eŭraźviazu. Jany nievialikija: letaś kancern «vybraŭ» hadavy limit užo za 8 miesiacaŭ. Pradpryjemstva maje namier pavialičyć kvoty, ustupiŭšy ŭ asacyjacyju «Eŭrateks», jakaja vyznačaje suśvietnuju pa-lityku vytvorčaści j prodažu tekstylnaj pradukcyi, łabiruje intaresy svaich členaŭ u Eŭraparlamencie. Siabroŭstva ŭ «Eŭrateksie» dazvolić pavialičyć kvoty na pastaŭku biełaruskaha tekstylu ŭ Eŭropu, daść mahčymaść pracavać z usimi suśvietnymi tekstylnymi pradpryjemstvami, a taksama karystacca eŭrapiejskaj infarmacyjnaj bazaj u halinie tekstylu.

Nieŭzabavie «Biellehpram» pieratvorycca ŭ niedziaržaŭny chołdynh. Kancern składajecca z 91 pradpryjemstva, na jakich pracujuć 120 tys. čałaviek. I choć 71 pradpryjemstva «Biellehpramu» ŭžo nie naležyć dziaržavie, siaredniaja rentabelnaść ich vielmi nizkaja — 5,3%, tamu j było pryniataje rašeńnie pra pryvatyzacyju. Admiena dziaržaŭnych kvotaŭ na zakup pradukcyi «Biellehpramu» budzie na karyść małym biełaruskim firmam, jakija vyrablajuć analahičnuju pradukcyju, adnak kvotaŭ nia majuć. Razam z tym, zamiežnyja kankurenty, u pieršuju čarhu z Rasiei, taksama apynucca ŭ lepšych umovach, bo abmiežavalnych kvot nakštałt amerykanskich ci eŭrapiejskich urad uvodzić nia budzie.

Aleś Kudrycki

• 0
• 0
• 0
• 0
• 0
• 0
• 0
• 0