Jašče adzin krok da 37-ha

Kamitet dziaržkantrolu atrymaŭ prava prasłuchoŭvać telefony i pamiaškańni, čytać zvyčajnuju i elektronnuju poštu. U kožnym z nas siadzić vorah narodu, sabatažnik i anhielski špijon. Pryniaty pałataj pradstaŭnikoŭ u pieršym čytańni zakonaprajekt «Ab uniasieńni źmienaŭ u Zakon Respubliki Biełarusi ab aperatyŭna-vyšukovaj dziejnaści» daje paŭnamoctvy vieści aperatyŭna-vyšukovuju dziejnaść až vaśmiom strukturam: orhanam unutranych spravaŭ, dziaržbiaśpieki, pamiežnych vojskaŭ, słužbie biaśpieki prezydenta, mytnym orhanam, orhanam zamiežnaj vyviedki i kamitetu dziaržkantrolu.

Kali raniej viedamstva Tozika mieła prava cikavicca tolki buchhalteryjaj, dyk ciapier upaŭnavažana źbirać lubuju infarmacyju pra pradpryjemstvy i arhanizacyi. «Heta možna skiravać suprać lubych niazhodnych z palitykaj režymu — pradprymalnikaŭ, dyrektaraŭ», — miarkuje advakat Aleh Voŭčak.

Źmieny tyčacca j pavieličeńnia terminaŭ viadzieńnia aperatyŭna-vyšukovaj dziejnaści. Z sankcyi hienprakurora źviestki ab złačynnych hrupoŭkach, arhanizacyjach, a taksama ab karupcyi mohuć ciapier praviaracca dva hady. Raniej hety termin nie pieravyšaŭ paŭtara hodu — i toje ŭ vyklučnych vypadkach.

Padstavami dla sačeńnia, jak zapisana ŭ zakonie 1999 h., zastajucca kryminalnaja sprava abo źviestki ab prykmietach złačynstva, ździejśnienaha ci zaplanavanaha, ab asobach, jakija padrychtavali, ździejśnili albo ździajśniajuć złačynstva; źviestki ab padziejach albo dziejańniach, što stvarajuć pahrozu nacyjanalnaj biaśpiecy krainy. Zakonam praduhledžvajecca prasłuchoŭvańnie pamiaškańniaŭ, kantrol paštovych i telehrafnych paviedamleńniaŭ, prasłuchoŭvańnie telefonaŭ, źniaćcie infarmacyi ź lubych techničnych kanałaŭ suviazi (elektronnaj pošty, mabilnikaŭ i h.d.). Hetyja materyjały mohuć paśla vykarystoŭvacca ŭ sudzie jak dokaz, a taksama słužyć padstavaj dla ŭzbudžeńnia kryminalnaj spravy. Juryst Pravaabarončaha centru «Viasna» Valancin Stefanovič kaža, što, uličvajučy siońniašniuju praktyku, možna zrabić vysnovu, što ŭ krainie ŭžo viadziecca aperatyŭna-vyšukovaja dziejnaść biez uzbudžeńnia kryminalnych spravaŭ, ažyćciaŭlajecca niehałosny nahlad za hramadzianami.

Pavieličeńnie terminu vyšuku da piaci hadoŭ praduhledžvajecca tolki dla adnoj hrupy złačynstvaŭ — «suprać miru, dziaržavy i biaśpieki čałaviectva». U novym KPK upieršyniu vyłučanaja takaja ekzatyčnaja hrupa złačynstvaŭ.

Bolš chadavym, u śviatle apošnich padziejaŭ ź ŚMI, moža apynucca punkt «złačynstvy suprać diaržavy i paradku ažyćciaŭleńnia ŭłady i kiravańnia».

U Biełarusi parlament nia maje mahčymaści praviarać pracu orhanaŭ aperatyŭna-vyšukovaj dziejnaści, tady jak u susiednich dziaržavach isnujuć specyjalnyja parlamenckija kamisii kantrolu za specsłužbami.

Vieranika Dziadok

• 0
• 0
• 0
• 0
• 0
• 0
• 0
• 0