Novy miech dla staroha kata

Takaja ŭžo asablivaść čałaviečaha rozumu: spatkaŭšy pobač dźvie rečy, jon abaviazkova, navat kali susiedztva vypadkovaje, imkniecca adšukać abjadnaŭčy matyŭ.

Paŭstańnie palityčnaha bloku z hučnaj nazvaju «Svabodnaja Biełaruś» — dobraja nahoda dla abahulnieńniaŭ.

Viadomyja asoby stvaryli strukturu dla vyłučeńnia kandydataŭ na vybarach, hetym razam — u pałatu pradstaŭnikoŭ. U kožnaj akruzie — pa kandydatu (viadoma ž, demakratyčnamu). Krychu raniej čułasia pra hetki ž namier bloku palityčnych partyj, i ŭžo było vidać, što poŭnaha adzinstva siarod ich — i, adpaviedna, adnaho naboru demakrataŭ — nia budzie. Novaja inicyjatyva moža dadać jašče pa adnamu demakratyčnamu šukalniku mandatu ŭ akruhi.

Sutnaści nia treba pamnažać bieź nieabchodnaści. U realijach biełaruskaj palityki pryncyp Okama vyhladaje žorstka: ci isnuje i kali isnuje, to jakaja nieabchodnaść pamnažeńnia palityčnych arhanizacyjaŭ apazycyjnaj nakiravanaści?

Pryčynaj niekantralavanaha pamnažeńnia padajecca adsutnaść u šerahach apazycyi mechanizmu palityčnaj kankurencyi pa-za miežami vybarčaj kampanii. Arhanizavanaje j kantralavanaje ŭładami dy žorstka krytykavanaje apazycyjanerami mierapryjemstva jość na siońnia ci nie adzinym polem, dzie demakraty/apazycyjanery zmahajucca. Pieravažna pamiž saboju.

Jak łučycca staŭka vyklučna na pieradvybarčuju ahitacyju j zaniadbańnie ŭsich inšych formaŭ palityčnaj pracy — ź niesupynnymi skarhami na manipulacyi, falsyfikacyi, vykarystańnie administracyjnaha cisku? Sumiaščeńnie niesumiaščalnaha žyvić niepazbyŭny niedavier da palitykaŭ, jakija, by tyja kvietki-efemerydy, ažyvajuć na niekalki tydniaŭ i znoŭku ŭpadajuć u son na doŭhi j niecikavy mižvybarčy sezon.

U palityčnym leksykonie nie pa ranhu pačesnaje miesca zajmieła słova «raskrutka», jakaja, na dobry rozum, jość farsažam na finalnym adrezku zmahańnia za ŭładu. Pretendenty na kiravańnie krainaj byccam zabylisia pra isnavańnie inšych sposabaŭ zdabyvańnia viadomaści j aŭtarytetu siarod vybarščykaŭ. Demakratyčnamu (abo, kali chočacie, apazycyjnamu) ruchu našmat bolš ad čarhovaje asacyjacyi pa pošuku kandydataŭ i naziralnikaŭ patrebny ŭnutrany mechanizm selekcyi ludziej z palityčnymi ambicyjami, jaki b vypraboŭvaŭ ichniuju zdolnaść stvarać i adstojvać admietnyja palityčnyja kancepcyi, prasoŭvać ich «u masy», reahavać na źmieny palityčnaj sytuacyi, pracavać nad vychavańniem u ludziej pačućcia nieabchodnaści śviadomaha vybaru. Inšymi słovami, kandydat u narodnyja abrańniki pavinien być pradstaŭnikom idei. Pošuk hodnych pradstaŭnikoŭ — sprava chutčej zakulisnaja i nia moža rabicca hałoŭnym składnikam palityčnaj kampanii.

Stvareńnie čarhovaha pieradvybarčaha bloku, za jakim niama nijakaje pazytyŭnaje prahramy, akramia deklaracyi pra žadańnie źmianić palityčny kurs, razhladajecca ŭ vyklučna niepryvabnym kantekście papiarednich aljansaŭ i zadzinočańniaŭ. Ale pryčyna nia tolki ŭ pravale hetych sprobaŭ adnym skokam apynucca na viaršyniach ułady.

Vybarščyku znoŭku prapanujuć scenar biazdumnaha hałasavańnia «za svaich», jakija tolki tamu svaje, što nazvalisia apazycyjanerami. Apazycyjnaść isnamu režymu vyjaŭlajecca ledźvie nie adzinym łučvom pamiž vybarščykam i palitykam. Imhlisty alternatyŭny šlach dla Biełarusi vyznačajecca adno jak supraćlehły ŭziatamu kursu. Ale takoje pazycyjanavańnie bolš čym niedastatkovaje i nikoli nie zadavolić dyrektara pradpryjemstva, jaki namahajecca akreślić stratehiju na try—piać hadoŭ. Niazhoda z uładaju, kryŭda na ŭładu, rasčaravańnie ŭ dziejnaj uładzie — chiba heta možna ličyć palityčnaj prahramaj?

Šyrokija abjadnańni z pryhožymi nazvami padkreślivajuć nia stolki rašučaść u zmahańni ź isnym režymam, kolki adsutnaść u demakrataŭ staŭki na ludziej, jakija dumajuć. Spadziavańnie idzie bolš na toje, što niazhodny z najaŭnym režymam choćki-niachoćki budzie hałasavać za taho, chto adrapartujecca apazycyjaneram.

Dy tolki vyniki vybaraŭ vyznačajucca nie na praciahu karotkich tydniaŭ aficyjnaje kampanii. Pryhožaja šylda j viadomyja imiony mohuć pryciahnuć uvahu vybarščyka ŭ haračcy kampanii i skiravać pratestnyja nastroi ŭ peŭnaje, ale ŭžo daloka nie adzinaje rečyšča, adnak jany nia ŭ stanie pierakanać tych, chto stavicca da vybaru adkazna, i nie dadajuć arhumentaŭ tym, chto žadaje ŭpłyvać na mierkavańni inšych. Tut našmat bolš prydalisia b źviestki niezaležnaha manitorynhu ŭzroŭniu žyćcia, jaki koliś «pahražaŭ» stvaryć U.Hančaryk.

Adsutnaść palityčnych kancepcyj, bieśpierapynnaj ahitacyjnaj pracy, vyklučnaja staŭka na pratest — prykmieta prymityvizmu palityčnaha žyćcia, prymityvizmu, ź jakim nia budzie zmahacca ani «Svabodnaja Biełaruś», ani ruch «Za hodnaje žyćcio», ani inšyja asacyjacyi šukalnikaŭ mandataŭ, začaravanyja najnoŭšym fetyšam palityčnaje numaralohii — ličbaju 110.

Miž tym, nazirajecca niepryjemnaja evalucyja ŭjaŭleńniaŭ pra palityčnuju apazycyju. Defarmacyja zajšła nastolki daloka, što ŭjaŭleńnie pra palityčnuju alternatyvu režymu jak ruch za pravy mienšaści robicca ahulnym miescam užo nie razmovaŭ na vulicach, a davoli vyšukanaj publicystyki. Adhortvajučy staronki «Arche» ŭ pošukach pačatku artykułu pra naradžeńnie BNR, ja vypadkova pieraskočyŭ niekalki lišnich bačynaŭ, i nazva raździełu ŭraziła mianie jak pierunom: «Hiej-zmahańnie i dośvied biełaruskaha nacyjanalnaha ruchu». Jašče trochi pośpiechaŭ u hiej-zmahańni — i nastaŭnik z vučniem pamianiajucca miescami.

Alaksandar Karolčyk

• 0
• 0
• 0
• 0
• 0
• 0
• 0
• 0