Ni rubla parazytam
5 miljonaŭ 25 tysiačaŭ rubloŭ za staronku — mienavita taki rachunak za teleprahramu vystaviła «Našaj Nivie», jak i inšym niezaležnym hazetam, Biełaruskaje telehrafnaje ahienctva. «NN» padavała zajaŭku na šeść telekanałaŭ, pryčym na biełaruskuju movu ahienctva prahramy «nie pierakładaje». Takim čynam, doraha kaštuje praca spadaroŭ pa kapijavańni tekstaŭ z šaści fajłaŭ, jakija jany atrymlivajuć ad telekanałaŭ, u adzin.
Tak zvanyja «dziaržaŭnyja» ŚMI ŭ Biełarusi daŭno ŭžo nijakija nie dziaržaŭnyja i nie hramadzkija (takimi źjaŭlajucca, naprykład, Bi-Bi-Si ŭ Brytanii ci CDF u Niamieččynie). Telekanały i «Źviozdy» manapalizavaŭ i vykarystoŭvaje dla ŭtrymańnia ŭłady i realizacyi svaich intaresaŭ adzin kłan. Zamiest taho kab adlustroŭvać pazycyi roznych słajoŭ hramadztva, davać słova pradstaŭnikam roznych palityčnych siłaŭ, kab ludzi mahli vybirać samych tałkovych, jany prapahandujuć adnu siłu i jaje idealohiju, stvarajuć kult adnaje asoby. Absurdnaja navat dumka, kab prezydent Buš zahadaŭ pradavać teleprahramu hazecie «Ńju-Jork tajmz» za bolšyja hrošy, čym «Vašynhton post». Abo kab prezydent Kvaśnieŭski davioŭ ministram zadańni pa skaračeńni aŭdytoryi «apazycyjnaj» «Žečpaspolitaj».
Pradajučy «dziaržaŭnym» hazetam TV-prahramu za 35—50 tys. rubloŭ i vystaŭlajučy niezaležnym vydańniam rachunak na 5 miljonaŭ, ułady raźličvajuć asłabić svabodnuju presu. U ich raźliku adny niezaležnyja hazety nia zmohuć sabie dazvolić kuplać teleprahramu i straciać častku čytačoŭ praz heta, a druhija buduć jaje nabyvać za kazačnuju canu i takim čynam pahoršać svajo finansavaje stanovišča, a śledam i jakaść, i taksama straciać častku čytačoŭ.
Karaciej, u hetym numary TV-prahramy vy ŭžo nia znojdziecie. Šukajcie jaje ŭ teletekście ci biaspłatnych hazetach. A jak što — dyk i zusim nie hladzicie taho telebačańnia: nie padurniejecie.
Na sajcie ahienctva BiełTA achvotnym nabyvać teleprahramu prapanujecca kantaktavać praz telefony abo elektronnuju poštu z nastupnymi asobami:
Biaśśmiertny Alaksandar. Teł. 226-02-97. E-mail: [email protected]
Daviedki pa cenach: Chandohina Alena. Teł. 222-30-40. E-mail: [email protected]
Upeŭnienyja, što vy nabyvali «NN» nie dziela teleprahramy.
Na pratestancki fiestyval u «Čyžoŭku-Arenu» jedzie amierykanski prapaviednik Franklin Hrem. Razam ź im čakajuć Koŭła z žonkaj14
Kamientary