Čarnobyl: ad bolu da biznesu

Novaja zbroja dziaržavy ŭ baraćbie z vynikami Čarnobylu: suprać izatopaŭ celziju i chroncyju budzie zmahacca rynkavy laisser-faire. Heta dazvolić kančatkova likvidavać u biudžecie čarnobylski artykuł, a ŭ hateli «Eŭropa» bide možna budzie pastavić nia tolki ŭ numarach, ale i ŭ liftach.

Jak piša «BH», nadoječy, vystupajučy ŭ «pałatcy», V.Całko, kiraŭnik Dziaržčarnobylu, padzialiŭsia z deputatami hienijalnym pražektam: na praciahu 2006—2008 h. zamucić na terytoryi čarnobylskaj zony niekalki svabodnych ekanamičnych zon (SEZ). Lohika ŭ Całka, vidavočna, takaja: pačuŭšy pra nizkija padatki, u zonu pryprecca lehijon biznesmenaŭ. Jany daduć pracoŭnyja miescy tubylcam, a miascovym biudžetam — hrošy.

U vyniku erbešny biudžet narešcie skinie ź siabie chamut čarnobylskich raschodaŭ i pieraklučycca na bolš cikavyja prajekty — naprykład budaŭnictva piacizorkavaha hatelu «Eŭropa» ź bide ŭ kožnym numary.

Jak pryznaŭsia sam sp.Całko, ideja z SEZ naležyć nie jamu, a ekspertam Suśvietnaha banku.

Škada, što farmat artykułu nie dazvalaje razhornuta prezentavać čarnobylskuju kancepcyju Suśvietnaha banku, kankretna — jaho słavuty rapart №23883-BY. Jen strakacić viasiołymi perłami, jakija nie sastupajuć baćkavym: «Siaredni pamier dziciačaj dapamohi stvaraje ŭ nasielnictva zony hultajskija nastroi i pazbaŭlaje stymułaŭ da pracy. … Asnoŭnymi pryčynami prablemaŭ sa zdaroŭjem žycharoŭ zony źjaŭlajucca alkahol i paleńnie».

Kudy cikaviej toje, što dziaržava źbirajecca praktykavać novy padychod vyrašeńnia prablem Čarnobylu — nie za košt prahresiŭnaha pieraraźmierkavańnia biudžetnych asyhnavańniaŭ, a za košt stvareńnia pryvabnaha investycyjnaha klimatu.

Kali tak, ja b raiŭ sp.Całku nie spyniacca na idei SEZaŭ, a śmieła pieranosić na biełaruskuju hlebu ŭvieś histaryčny dośvied kamercyi.

Jość taki biznes-plan — zasnavać «Ost-Čarnobylskuju kampaniju», nakštałt kampanij pirataŭ-kupcoŭ u siaredniaviečnaj Eŭropie. Kampanii treba dać padatkovyja lhoty i navat kaperskuju licenziju — dazvolić rabavać usich «čaŭnakoŭ». Pamiatujučy pra pośpiechi «Vest-Indyjskaj kampanii» padčas kalanizacyi Karybaŭ, možna nie sumniavacca, što zona chutka pieratvorycca ŭ piaščotnaje voka Bermudy.

Abo pryhadajcie — jakim byŭ raniej imidž štatu Nevada? Tak-tak, radyjacyjna niebiaśpiečnaja zona, tamu što jakraz tut znachodzicca atamny palihon dziadźki Sema. Ale nie paśpieli ŭ Łas-Vehasie adkryć pieršaje kazyno, jak siudy nabiehła arda biznesmenaŭ. A čym my durniejšyja? Hałoŭnaje — bolej fantazii: chvojnicki karnavał nakštałt Mardy-Hras «Čarnobylski šlach», naraŭlanskaje kazyno z hulniavymi aŭtamatami «Trochruki mutant», łojeŭskaje šoŭ «Śviaciaščyjasia likvidatary»…

Adnak aptymalny varyjant dla napampoŭvańnia rehijonu hrašyma — nie svabodnaja ekanamičnaja, a svabodnaja demakratyčnaja zona (SDZ). Jarmošyna musić chutčej abviaścić, što parlamenckija vybary ŭ zonie adbuducca zhodna z usimi mižnarodnymi standartami — biez papiaredniaha hałasavańnia, z prazrystym nazirańniem, biez adminresursu, z roŭnym dostupam da ŚMI…

Viedajučy napaleonaŭskija ambicyi našych demakrataŭ, harantuju, što ŭsie buduć vyłučacca ad zony. U vyniku absalutnaja bolšaść z 40 miljonaŭ baksaŭ, jakija Kanhres źbirajecca adšpilić apazycyi, abaviazkova asiaduć tut — na karyść achviaraŭ Čarnobylu.

Heta dazvolić kančatkova likvidavać u biudžecie čarnobylski artykuł. Hrošaj budzie šmat. Tak šmat, što ŭ hateli «Eŭropa» bide možna budzie pastavić nia tolki ŭ numarach, ale i ŭ liftach.

Lolik Uškin, levy radykał

• 0
• 0
• 0
• 0
• 0
• 0
• 0
• 0