Centar biełaruskaj palityki pieramiaściŭsia na Kazarmienny zavułak. Kvatera deputata Frałova stała hetymi dniami sapraŭdnym štabam apazycyi. Štoviečar a 18-j siudy ściakajucca sympatyzanty i prychodziać śpiavać artysty. Tut hurtujucca palityki. Tut dziažurać žurnalisty i pravaabaroncy. Tut chavajucca ad zatrymańnia aktyvisty AHP. Na Kazarmiennym idzie novaje źličeńnie dzion — ad 3 červienia, pieršaha dnia haładoŭki. Haładoŭščykaŭ pa čarzie štodzień ahladaje doktar, jaki sočyć za ich zdaroŭjem. Nastrojenyja ŭsie aptymistyčna.
Siarhiej Skrabiec da doktara nie idzie: svoj stan jon viedaje daskanała z 22-dzionnaj letašniaj haładoŭki (taja, praŭda, była dla ŭmacavańnia stanu zdaroŭja). U dvary ŭviečary źbirajucca pres-kanferencyi, paśla jakich nichto nie śpiašajecca razychodzicca. Usio pa-svojsku: Frałoŭ u chatnich tapačkach, usie ŭ humory i z žartami.
Uviečary tut hurtujucca palityki, a taksama artysty. U aŭtorak, zmabilizavanyja Alaksandram Dabravolskim, dla deputataŭ śpiavali Źmicier Sidarovič i Kasia Kamockaja, jakaja, jak vyjaviłasia, dalokaja svajačka Ŭładzimiera Parfianoviča.
Samaja niečakanaja padtrymka pryjšła ad pradprymalnikaŭ: pradprymalnicki lider Anatol Šumčanka abvieściŭ, što na 17 červienia pryznačana ahulnanacyjanalnaja zabastoŭka pradprymalnikaŭ u padtrymku patrabavańniaŭ deputataŭ.
Aŭtobusik z amapaŭcami dzień i noč dziažuryć ź inšaha boku budynku, ale ŭvachod u kvateru volny. Infarmacyjnuju padtrymku naładzili AHP i «Małady front», a taksama pravaabarončyja arhanizacyi, pradstaŭniki jakich stała dziažurać na Kazarmiennym. Siarhiej Skrabiec uražany dałučeńniem da haładoŭki inšych ludziej: «My ŭvohule nie raźličvali na toje, što niechta budzie dałučacca. Z hetaj padtrymkaj nam lahčej. Značyć, nia ŭsich zapužali ŭ hetaj krainie».
Haładoŭščyki ŭvieś čas trymajuć suviaź z kalehami-deputatami, jakija ich padtrymlivajuć, i hatovy źjavicca na pasiedžańnie, kali budzie razhladacca «ichny» zakonaprajekt. Na pytańnie ab svoječasovaści pierachodu da nieparlamenckich metadaŭ baraćby Siarhiej Skrabiec adkazvaje: «Usie metady sprabavali, nam nie dajuć vystupać. Kali nam adklučajuć mikrafony, kali majho pamočnika nie puskajuć u pałatu pradstaŭnikoŭ — što heta za praca?»
Pakul što viečarami na Kazarmiennym źbirajecca tolki sotnia čałaviek. Adnak padtrymka hramadztva nadaje značeńnie i sens akcyi, u jakoj napačatku mnohija bačyli tolki pijar.
Mikoła Buhaj
Kamientary