CHRONIKA

Za praviadzieńnie pikietu 3 žniŭnia na Kastryčnickaj płoščy Miensku asudžany aktyvisty AHP Alaksiej Prychodźka (15 sutak), Natalla Zubarevič (10 s.), Taciana Łaryjonava (30 b.v.). N.Zubarevič paśla 3 sutak utrymańnia ŭ pryjomniku-raźmierkavalniku 10 žniŭnia była dastaŭlenaja ŭ adździaleńnie kardyjalohii bolnicy ŭ Baraŭlanach. Aktyvist prafsajuzu REPAM Ivan Roman 3 žniŭnia byŭ zatrymany kala prachadnoj Haradzienskaha zavodu aŭtamabilnych ahrehataŭ padčas razdačy prafsajuznych biuleteniaŭ — 174 biuleteni kanfiskavany, chacia mieli ŭsie vychodnyja źviestki. 3 žniŭnia supracoŭniki milicyi Hancavickaha rajonu zatrymali ŭdzielnikaŭ akcyi suprać raźmiaščeńnia rasiejskaj radyjolakacyjnaj stancyi «Vołha» ŭ Biełarusi; arhanizatar akcyi namieśnik staršyni Mienskaj abłasnoj arhanizacyi PBNF Pavał Batujeŭ 4 žniŭnia atrymaŭ pozvu ŭ sud za «arhanizacyju niesankcyjavanaha pikietu». 4 žniŭnia za znachodžańnie na rasiejskaj terytoryi j niesankcyjavanaje pikietavańnie kala vioski Mašuki Kleckaha rajonu byli zatrymanyja maładafrontaŭcy Hanna Škaranda, Palina Tabakova, Natalla Maksimava, Ivan Hleb, Vadzim Miesiadzienka, Pavał Karaniuchin, Alena Dvajnova, Jaŭhien Vaŭkaviec, Siaržuk Savič i Pavał Krasoŭski. S.Saviča z Žodzina papiaredzili pra adličeńnie z Akademii MUS za ŭdzieł u rejdzie ź infarmavańniem pra rasiejskuju RŁS. Supracoŭnicu dziaržaŭnaj arhanizacyi Tacianu Žabko (Maładečna), jakaja taksama ŭdzielničała ŭ pachodzie, na pracy prymusili napisać tłumačalnuju nakont taho, dzie jana była padčas adpačynku. Čyhunačny rajonny sud Viciebsku 4 žniŭnia aštrafavaŭ Barysa Chamajdu na 20 b.v. za «niezakonnuju pradprymalnickuju dziejnaść»: Chamajda kazaŭ, što biaspłatna raspaŭsiudžvaje «BDH» i nia maje z taho prybytkaŭ, ale sudździa da ŭvahi pakazańni śviedkaŭ nie pryniaŭ. Hazeta «Rabočaja salidarnaść» 4 žniŭnia spyniła svajo isnavańnie, bo jaje zasnavalnik — užo likvidavanaja Biełaruskaja partyja pracy. Volha Zavadzkaja, maci źnikłaha teleaperatara Źmitra Zavadzkaha, 4 žniŭnia nakiravała ŭ Prakuraturu zajavu z patrabavańniem uznavić raśśledavańnie pa spravie jaje syna i dapytać A.Łukašenku jak śviedku. Aktyvistaŭ Svabodnaha prafsajuzu biełaruskaha Viktara Stukava i Mikołu Šaracha zatrymali 4 žniŭnia na prachadnoj AAT «Połacak-Škłovałakno» i paśla nadhladu asabistych rečaŭ zabaranili pranosić na terytoryju pradpryjemstva prafsajuzny infarmacyjny biuleteń «Riehion»; zatrymka padčas zabirańnia biuleteniaŭ i składańnia pratakołu była aformlena jak spaźnieńnie na pracoŭnaje miesca. 5, 6 žniŭnia byŭ sarvany vychad «Narodnaj voli»: sudovy vykanaŭca aryštavaŭ bankaŭski rachunak vydańnia i papieru, na jakoj pavinien byŭ drukavacca nakład. Numar vyjšaŭ tolki 7 žniŭnia, paśla taho jak redakcyja «NV» zapłaciła kala 70 młn rub. pavodle pazovaŭ S.Atroščanki i Ja.Rybakova. 5 žniŭnia hienprakuror V.Šejman adchiliŭ chadajnictva pra vyzvaleńnie z-pad varty Michaiła Maryniča, 6 žniŭnia Marynič zajaviŭ advod novamu śledčamu Barysu Rahimavu. 6 žniŭnia pad ciskam administracyi Barysaŭskaha zavodu aŭtatraktarnaha abstalavańnia (pahroza zvalnieńnia z pryčyny skaračeńnia štataŭ) zajavu pra vychad z REPAMu padaŭ Źmicier Ćviatkoŭ. Siabry AHP Viktar Kakareka i Źmicier Słucki padali pazovy ŭ Haradzienski abłasny sud na vyniki farmavańnia vybarčych kamisij. 6 žniŭnia deputat hrupy «Respublika» hienerał Valer Frałoŭ padaŭ sudovy pazoŭ pra abaronu honaru i hodnaści: jon patrabuje ad S.Atroščanki 100 młn rub. za toje, što ŭ hazecie «Obozrievatiel» (zasnavalnik Atroščanka) jaho nazvali antysemitam. U kvatery aktyvistki «Zubra» Nasty Vasilenki z Baranavič 6 žniŭnia supracoŭniki milicyi z sankcyi prakurora naładzili pieratrus, zajaviŭšy, što šukajuć skradzieny mabilny telefon; telefona nie znajšli, ale kanfiskavali niezaležnyja vydańni i ŭlotki, a taksama dziaŭčynin natatnik. 9 žniŭnia Kalehija pa hramadzianskich spravach Mienskaha haradzkoha sudu nie zadavoliła skarhi Sojmu PBNF na rašeńnie sudu Pieršamajskaha rajonu — sud admoviŭsia pačynać kryminalnuju spravu suprać Biełteleradyjokampanii j žurnalista Ju.Prakopava pa abaronie honaru i hodnaści partyi. Aktyvista AHP ź Mioraŭ Valera Karalova supracoŭniki milicyi zatrymali 9 žniŭnia na Maskoŭskim aŭtavakzale Miensku padčas razdačy infarmacyjnych materyjałaŭ «5+» dy hazety «Vriemia». Nieŭzabavie tudy ž prybyli supracoŭnik prakuratury j dvoje z KDB. Milicyjant cikaviŭsia krynicami pastupleńnia litaratury. Kadebisty — pohladami, pierakanańniami, pajezdkami za miažu.

AŠ

• 0
• 0
• 0
• 0
• 0
• 0
• 0
• 0