Maskva źbivaje košt našych pradpryjemstvaŭ
Biełaruski ŭrad prosić ŭžo nie paŭtara, a dva miljardy. Rasieja ž vyłučaje novyja ŭmovy. Piša ŭ svaim błohu Alaksandar Kłaskoŭski.
"Kommiersant'" vydaŭ sakret Pališynela: pad markaj sajuznaha Saŭminu Sidorski jeździŭ u Maskvu vybivać kredyt. Navinoj ža jość toje, što prosim užo nie paŭtara miljardy, a dva. Takim čynam, biełaruskaja stabilnaść padrasła ŭ canie.
Darečy, z učorašniaha dnia za tysiaču kuboŭ rasiejskaha hazu Biełaruś musić vykładać na bočku ŭžo nie 55, a 100 dalaraŭ. Napiaredadni ministar ekanomiki Zajčanka badziora zajaviŭ, što na stanie haliny heta nijak nie adabjecca. Miž tym dniom raniej jahony šef u Maskvie dramatyčna abmaloŭvaŭ vielizarnyja straty našaj krainy ad padaražańnia enerhanośbitaŭ.
Pryčym raspovied Sidorskaha čamuści padajecca bližejšym da iściny. Kab varunki nie pryciskali, to našto było b vymolvać na miažy prynižeńnia tyja hrošy? Pryčym užo navat nie paŭtara, a dva miljardy. Viedajučy, što Maskva tut svajho nia ŭpuścić.
I sapraŭdy, jana, pavodle "Kommiersanta", vyłučaje dźvie ŭmovy. Pa-pieršaje, kab byŭ pierarobleny biełaruski biudžet, u jakim pakul što nie adlustravany novyja ceny na haz. Nu, heta, badaj, całkam słušna — hodzie ŭžo malavać ličby, što nijak nie karelujucca z realijami. Ale hałoŭnaje palahaje ŭ tym, što Maskva zmušaje biełaruski bok chutčej dy tańniej pradać "familnaje srebra".
Što ž majem u suchoj astačy?
Vyhladaje na toje, što słavutaja "šmatvektarnaja palityka" stałasia blefam. Šejchi zasypać nas svaim zołatam nie śpiašajucca. Kitajcy (ad ich Miensk taksama choča atrymać miljard) choć i zastajucca farmalna pad kamunistyčnym ściaham, ale kirujucca ŭ kredytnych pytańniach zusim nie praletarskim internacyjanalizmam, a žorstkim prahmatyzmam. Nu a Eŭropa dyk i ŭvohule jak anučaj pa pysie plasnuła pazbaŭleńniem preferencyj.
Karaciej, davodzicca skroź zuby znoŭ i znoŭ prasić hrošaj va ŭčorašnich partneraŭ pa "bratniaj intehracyi". Mienavita jana siońnia vyłazić bokam. I absiahu dla maneŭru ŭsio mieniej. Z adnaho boku — pašča rasiejskaha kryminalna-aliharchičnaha ŭdava. Ź inšaha — viłami ŭ bok tyrčać 12 umovaŭ Eŭraźviazu. Jany, kaniešnie, nie pahražajuć pahłynańniem. Ale vykanać tuju prahramu aznačaje pachavać režym. Dla kiroŭnych viarchoŭ — što savoj ab pień, što pniom ab savu.
Kamientary