Dajcie knihu prapanovaŭ

Nijak nie prakanaju palityčnaha efektu ŭkazu ab uviadzieńni dla partyj knih zaŭvah i prapanoŭ (KZP). Feljeton Lolika Uškina.

Žyviom u rašučy čas bitvy za fieńki słavianstva. Čas, kali kožnaja kaloryja, jakuju vertykalščyk spalvaje na pracy, pavinna lacieć u virtualny horan viktoryi nad hidraj apazycyi. Niaŭžo rašeńnie ab KZP źjaviłasia biez uliku palityčnaha momantu? Nia moža być!

Mahčyma, ułady marać, što, praanalizavaŭšy tekst zaŭvah, jany zmohuć bolš daviedacca ab planach łukafobaŭ?

Byccam zaskočyć niejki Skrabiec u «kukuruzinu» da AHP i pakinie ŭ miascovaj KZP paśla siabie «cialehu»: «Kiraŭnictva AHP, mnie nie padabajecca sučasnaja schiema trafiku amerykanskich hrantaŭ dla apazycyi. Unošu prapanovu ŭ nastupny raz baksy pieradavać praz bolš aŭtarytetnuju asobu, naprykład, sp.Bahdankieviča. I hrošy pieravozić nie praź litoŭska-biełaruski kardon, a praz polska-biełaruskuju miažu. Vaš Skrabiec».

Łuchta niejkaja.

Toje samaje z prapanovami. Nu jakija prapanovy mohuć być u sapraŭdnych apazycyjaneraŭ?

Tolki adna. My ŭsie cudoŭna viedajem, ab čyjoj fizyčnaj śmierci jany marać i što jany mohuć dziela hetaha prapanavać. Niaŭžo hetamu palityku, sapraŭdy pa prykole čytać, jak jaho skłaniajuć na ŭsie łady, to pasyłajučy ŭ procilehły Eŭropie fizijalahičny punkt, to prapanujučy addać jaho orhany zavodam chlebapraduktaŭ, kab na vychadzie atrymać tavar — hodny kankurent kambikormu.

Niešta nie sychodzicca.

Zastajecca tolki pijar. Kab čarhovy raz davieści ahidnaść apazycyi ŭ vačach narodu, z časam pa BT mohuć pracytavać tuzin-druhi perłaŭ z partyjnych KZP. Voś, maŭlaŭ, što dumajuć pra vas, apazycyjanery, «prostyja hramadzianie».

Nakštałt: «Darahi Viačorka. Prajaždžajučy praz vaš čudziesny horad z partyjaj dziaŭčat dla haremu pedafiła šejcha Sałambeka, mnie nie było dzie pierakantavacca. Dziakuju siabram BNF, jakija padabrali mianie i jašče pakuryli trava. Vach-vach-vach. Kakije džyhity. Balšoj vam madžoba. Narkadyler Ali Baba. Moj adras: Aŭhanistan, očan daloki kišłak».

A možna pajści jašče dalej.

Naprykład, niečakana abviaścić pa Akademii milicyi, budynak jakoj znachodzicca pa susiedztvie z beenefaŭskaj siadzibaj, zahad rektaratu: «Siońnia kožny kursant pavinien naviedać siadzibu BNF, kab unieści ŭ partyjnuju KZP skarhu pavodle nastupnaha trafaretu: «Sp.Viačorka. Ja, prosty hramadzianin, kursant kinalahičnaj sekcyi Akademii MUS, mušu paskardzicca na siabroŭ vašaj partyi, jakija svaimi jenkami «Žyvie Biełaruś» nie dajuć narmalna vieści vučebny praces pa adukacyi sabak. U sabak pačynajecca kleptamanija i bulimija. Kali vy nia zrobicie adpaviednych zachadaŭ, ja budu prasić Miniust zabaranić vašu arhanizacyju». Chto nia zrobić skarhu, nia budzie dapuščany da sesii. Starastam skłaści śpisy tych, što prafiłoniać. Rektar».

I što musić zrabić Miniust paśla takoj masavaj narodnaj petycyi? Naturalna, unieści ŭ KZP PBNF apošni zapis: «Likvidavać KZP Partyi BNF jak arhanizacyi, likvidavanaj pa prapanovie narodu».

• 0
• 0
• 0
• 0
• 0
• 0
• 0
• 0