Rasijski hrosmajstar Uładzimir Kramnik atrymaŭ hod dyskvalifikacyi — z-za abvinavačvańniaŭ u čycinhu pamierłaha hrosmajstara Naradzickaha
Akramia taho, jamu pryznačyli dadatkovuju sankcyju — 12 miesiacaŭ nieapłatnaj pracy na karyść šachmatnaj supolnaści.
Kamisija FIDE (Suśvietnaj fiederacyi šachmat) pa etycy i dyscyplinie vyniesła rašeńnie ŭ dyscyplinarnaj spravie ŭ dačynieńni da byłoha čempijona śvietu Uładzimira Kramnika.
Razhlad spravy byŭ raspačaty paśla skarhaŭ, padadzienych Praŭleńniem FIDE i Kamisijaj pa sumlennaj hulni. Jany datyčylisia praciahłaj sieryi publičnych zajaŭ i paviedamleńniaŭ u sacyjalnych sietkach, zroblenych hrosmajstram Uładzimiram Kramnikam u dačynieńni da hrosmajstra Davida Navary, niabožčyka hrosmajstra Daniela Naradzickaha, a taksama inšych šachmatystaŭ.
Paśla ŭsiebakovaha vyvučeńnia dokazaŭ i pazicyj usich bakoŭ EDC pryznała Kramnika vinavatym u šerahu parušeńniaŭ Kodeksa etyki i Dyscyplinarnaha kodeksa FIDE.
«Uličyŭšy jak abciažarvajučyja, tak i źmiakčalnyja akaličnaści, EDC pryznačyła Kramniku pakarańnie ŭ vyhladzie dvuchhadovaj zabarony na ŭdzieł va ŭsich šachmatnych spabornictvach pad ehidaj FIDE i vykanańnie lubych aficyjnych funkcyj u šachmatach. Apošnija 12 miesiacaŭ hetaha terminu prypynienyja na vyprabavalny pieryjad praciahłaściu try hady. Heta aznačaje, što faktyčna Kramnik budzie adchileny ad udziełu na adzin hod, kali na praciahu vyprabavalnaha terminu nie dapuścić novych parušeńniaŭ», — havorycca ŭ zajavie FIDE
Akramia taho, Kamisija pryznačyła jamu dadatkovuju sankcyju — 12 miesiacaŭ nieapłatnaj pracy na karyść šachmatnaj supolnaści.
Papularyzatar šachmat z ZŠA Daniel Naradzicki raptoŭna pamior u kastryčniku minułaha hoda va ŭzroście 29 hadoŭ.
Kramnik na praciahu hoda abvinavačvaŭ Naradzickaha ŭ niesumlennaj hulni. Jon demanstravaŭ videazapisy anłajn-hulniaŭ Naradzickaha, śćviardžajučy, što toj padhladvaŭ na inšy ekran, na jakim chady raźličvała kampjutarnaja prahrama.
Naradzicki rašuča adkidaŭ hetyja abvinavačańni. 29‑hadovaha šachmatysta i papularnaha strymiera taksama nikoli nie abvinavačvali ŭ niesumlennaj hulni inšyja hulcy.
Napiaredadni śmierci Naradzicki pryznaŭsia, što ciažka pieražyvaje hetyja abvinavačańni.
Daniela znajšli nieprytomnym u jaho domie 19 kastryčnika, za dzień da taho, jak pra jaho śmierć abviaścili publična.
Naradzicki pachodziŭ ź siamji jaŭrejskich imihrantaŭ z SSSR. Jaho baćka, Uładzimir, pierajechaŭ u ZŠA z Ukrainy, a maci Alena — z Azierbajdžana.
Ciapier čytajuć
Milicyja zatrymała taho samaha rasijskaha turysta, jaki kinuŭ niedakurak na vulicy. Zaŭtra sud18
Kamientary