U Vialikabrytanii skandał — vytvorca dzionier-kiebabaŭ hadami zamiest baraniny kłaŭ u ich kaźlacinu
U Vialikabrytanii razhareŭsia charčovy skandał vakoł adnaho z najbujniejšych vytvorcaŭ dzionier-kiebabaŭ — kampanii Kismet Kebabs. Śledstva vyśvietliła, što na praciahu niekalkich hadoŭ pradukcyja, jakaja pradavałasia jak kiebab z baraniny, nasamreč utrymlivała vielmi mała hetaha miasa, piša Bi-bi-si.
Pravierki z vykarystańniem DNK-analizu pakazali, što kiebaby, na ŭpakoŭcy jakich paznačałasia da 70—87% baraniny, nasamreč utrymlivali mienš za 10% kampanientaŭ, źviazanych z aviečym miasam. Zamiest hetaha ŭ skład uvachodzili kaźlacina, žyviolny tłušč, skura i miasnyja abrezki.
Padazreńni ŭźnikli paśla taho, jak supracoŭniki słužby handlovych standartaŭ u Suonsi praviali vypadkovyja pravierki pradukcyi ŭ miascovych ustanovach chutkaha charčavańnia. Paźniej inśpiektary naviedali zavod kampanii ŭ hrafstvie Esieks i vyjavili, što baranina tam praktyčna nie vykarystoŭvałasia. Pavodle śledstva, syravinu zdrabniali ŭ adnu masu, a zatym fasavali ŭ roznyja ŭpakoŭki z paznakami pra vysokaje ŭtrymańnie baraniny.
U sudzie kampanija pryznała vinu ŭ charčovym machlarstvie. Sud aštrafavaŭ Kismet Kebabs na 500 tysiač funtaŭ sterlinhaŭ i abaviazaŭ vypłacić jašče kala 259 tysiač funtaŭ sudovych vydatkaŭ. Pavodle acenak śledstva, dziakujučy padmanu kampanija mahła atrymać kala 6 miljonaŭ funtaŭ prybytku.
Pradstaŭniki Kismet Kebabs zajavili, što parušeńni tyčacca padziej 2021 hoda i raniejšaha pieryjadu, kali kampanija pracavała pad inšym kiraŭnictvam. Jany śćviardžajuć, što paśla pravierki byli ŭniesienyja istotnyja źmieny ŭ vytvorčaść i sistemu kantrolu.
Brytanskaje Ahienctva pa charčovych standartach adznačyła, što hety vypadak staŭ vynikam metanakiravanaha rasśledavańnia, a ahulny ŭzrovień biaśpieki charčovych praduktaŭ u krainie zastajecca vysokim. Tym nie mienš, sprava ŭžo stała adnoj z samych hučnych u śfiery charčovaha machlarstva paśla skandału z vykarystańniem u praduktach kaniny, jaki adbyŭsia ŭ Jeŭropie ŭ 2013 hodzie.
Ciapier čytajuć
«Ty ŭ nas u Biełarusi!» — «Ja mamu tvaju ja*aŭ». Hościu z Ałtaja nie spadabałasia zaŭvaha za kinuty ŭ centry Minska niedakurak6
Kamientary