Лукашэнка звернецца з Пасланнем да народа і Нацыянальнага схода 28 студзеня. А што наконт 27 студзеня?
Аляксандр Лукашэнка звернецца з Пасланнем да беларускага народа і Нацыянальнага схода ў пятніцу, 28 студзеня. Раней меркавалася, што гэта будзе 27 студзеня.
Мерапрыемства пройдзе ў Палацы Рэспублікі, паводле прэс-сакратаркі Наталлі Эйсмант, «каб максімальна пашырыць кола запрошаных». Тое, каб зварот Лукашэнкі прагучаў менавіта ў Палацы Рэспублікі, а не ў Доме ураду, паводле Эйсмант, было «ініцыятывай з месцаў». Каб паслухаць зварот, як і ў мінулы раз, прыедзе «актыў» з усёй краіны.
Пасланне будзе транслявацца па нацыянальных каналах і па радыё ў прамым эфіры.
Раней меркавалася, што зварот Лукашэнкі адбудзецца 27 студзеня, бо на гэты дзень ён склікаў пазачарговую сесію Палаты прадстаўнікоў.
Але там будуць разглядаць законапраекты.
У першым чытанні заканадаўцы маюць намер разгледзець законапраект «Аб асновах сістэмы прафілактыкі безнагляднасці і правапарушэнняў непаўналетніх».
У другім чытанні — праект Закона «Аб змяненні законаў па пытаннях дзейнасці Кітайска-Беларускага індустрыяльнага парка «Вялікі камень».
Таксама дэпутаты разгледзяць праект Закона аб ратыфікацыі пратакола аб унясенні змяненняў у Дагавор аб процідзеянні легалізацыі (адмыванню) даходаў, атрыманых злачынным шляхам, і фінансаванню тэрарызму пры перамяшчэнні наяўных грашовых сродкаў і (або) грашовых інструментаў праз мытную мяжу Мытнага саюза ад 19 снежня 2011 года».
Акрамя таго, парламентарыі плануюць абмеркаваць пытанне аб дзейнасці Палаты прадстаўнікоў Нацыянальнага сходу Рэспублікі Беларусь у перыяд падрыхтоўкі і правядзення рэспубліканскага рэферэндуму.
Навошта было збіраць дэпутатаў на 27 студзеня, невядома.
Каментары