Жанчына пад Лагойскам узяла пакатацца трактар і трапіла на ім у аварыю
38-гадовая індывідуальная прадпрымальніца з вёскі Вялікія Бясяды Лагойскага раёна ўгнала трактар свайго прыяцеля і патрапіла на ім у ДТЗ, паведамляе УУС Мінскага аблвыканкама.
Здарэнне адбылося яшчэ 11 ліпеня. Паведамляецца, што жанчына і яе 50-гадовы сябар з Мінска ездзілі на яго трактары ў нецвярозым стане. На пару выклікалі ДАІ, пасля чаго жанчыну адвезлі дадому, а яе прыяцеля — на медагляд і для складання пратаколу за п'янае кіраванне.
Пасля гэтага жанчына вырашыла пакатацца адна. Ёй удалося завесці трактар і крануцца з месца, але ўжо праз некалькі метраў машына апынулася ў кювеце. Уладальніку тэхнікі жанчына пра гэта не паведаміла. А той, пабачыўшы, што стала з трактарам, заявіў пра яго ўгон.
У выніку заведзеная крымінальная справа, жанчыне пагражае некалькі гадоў турмы.
Каментары