Новы ўказ дазволіць паляванне на рысяў і мядзведзяў, занесеных у Чырвоную кнігу?
У Беларусі ў бліжэйшы час плануецца ўнесці істотныя змены ў правілы вядзення паляўнічай гаспадаркі і палявання. Сярод іншых зменаў новы ўказ прадугледжвае магчымасць палявання ў Беларусі на рысяў і мядзведзяў, якія занесены ў Чырвоную Кнігу.
Праект указа «Аб унясенні змяненняў і дапаўненняў ва ўказ прэзідэнта Рэспублікі Беларусь ад 8 снежня 2005 года №580» ужо падрыхтаваны і ўзгоднены з усімі міністэрствамі і ведамствамі і ўнесены на разгляд у Адміністрацыю прэзідэнта Рэспублікі Беларусь
Рэгуляванне распаўсюджвання і колькасці паляўнічых жывёл нармаваных відаў, а таксама мядзведзя і рысі, можна будзе праводзіць метадамі палявання. Гэта павысіць прыбытковасць паляўнічай гаспадаркі і зацікаўленасць карыстальнікаў паляўнічых гаспадарак у захаванні і памнажэнні колькасці мядзведзя і рысі.
Наталля Мінчанка, начальнік упраўлення біялагічнай і ландшафнай разнастайнасці Мінпрыроды, патлумачыла журналістам падчас прэс-канферэнцыі 3 сакавіка, што гаворка не ідзе пра бескантрольнае забойства рэдкіх жывёлаў. У выпадку, калі будуць прынятыя змяненні ва ўказ 580, працягвае працаваць Закон аб жывёльным свеце, які кажа, што адстрэл — гэта самая крайняя мера, калі адлоў і адсяленне дадзенай жывёліны не магчымы.
«Не важна, якім спосабам будзе канфіскавана гэта жывёла, шляхам продажу паляўнічай пуцёўкі альбо разавага дазволу на адстрэл, галоўнае, што гэта будзе самы апошні з варыянтаў вырашэння дадзенай праблемы. — заверыла Наталля Мінчанка, - Я хачу зрабіць акцэнт на тым, чаму менавіта шляхам палявання. Паляўнічая гаспадарка ўсё ж такі церпіць нейкія выдаткі і страты, з прычыны таго, што дадзеная жывёла на яе тэрыторыі. Паляванне будзе кампенсаваць некаторыя выдаткі для паляўнічай гаспадаркі.
Наталля Мінчанка завярае, што выводзіць сёння гэтых жывёлаў з Чырвонай кнігі ніхто не збіраецца. Такое пытанне абмяркоўвалася, аднак Акадэмія навук не можа прадаставіць неабходных дадзеных, ды і Мінпрыроды супраць такога рашэння.
У той час украінскія і расійскія эколагі вельмі ўсхваляваныя новым указам, і падрыхтавалі зварот да прэзідэнта Беларусі ў абарону рысі і мядзведзя. Сустаршыня Міжнароднага Сацыяльна-экалагічнага Саюза Валерыя Брыніха (Расія) і дырэктар Кіеўскага эколага-культурнага цэнтра, Заслужаны прыродаахоўнік Украіны Уладзімір Барэйка у сваім лісце Александра Лукашэнкі зазначаюць:
«На наш погляд, адкрыццё палявання на два рэдкіх, занесеных у беларускую Чырвоную кнігу віду жывёл - мядзведзя і рысі, можа прывесці да іх поўнага знішчэння на тэрыторыі Вашай краіны, бо менавіта паляванне названа адной з галоўных прычын скарачэння колькасці гэтых відаў у нарысах Чырвонай кнігі . Калі гэтыя віды знікаюць з-за палявання, то як жа паляванне можа выратаваць іх ад знікнення?»
Эколагі адзначаюць, што ў суседняй Украіне, дзе колькасць мядзведзя і рысі значна вышэй (300 і 500 асобаў адпаведна), гэтыя жывёлы таксама занесены ў Чырвоную кнігу і ніякага палявання на іх няма. І таму просяць Аляксандра Грыгор’евіча не дапусціць адкрыццё палявання ў Беларусі на занесеных у Чырвоную кнігу мядзведзя і рысь, а таксама закрыць паляванне на зубра.
Каментары