Ад 19 ліпеня на мясных прылаўках можна набыць толькі ялавічыну і кураціну. Такое рашэнне прыняў Маладзечанскі райвыканкам.
«Свіная чума да Маладзечанскага раёна пакуль не дайшла», — кажа галоўны дзяржаўны ветэрынарны доктар Маладзечанскага раёна Мікалай Малінец. — А тое, што забаранілі гандляваць свіным мясам, гэта ў мэтах прафілактыкі».
У чацвер адміністрацыя маладзечанскіх рынкаў атрымала пастанову ад райвыканкама, дзе у мэтах недапушчэння распаўсюджвання афрыканскай свіной чумы на тэрыторыі Маладзечанскага раёна забаранілі гандляваць свінінай.
Але кілбасны павільён не зачынены, там можна набыць перапрацаваныя прадукты: вараныя і вэнджаныя кілбасы, рулеты.
«Свініну, якую ўчора не прадалі, цалкам вывезлі з тэрыторыі рынку, — кажа начальнік Маладзечанскага рынку райспажыўтаварыства Ганна Сіняўская. — А што з ёй будуць рабіць далей — я не ведаю. Такое правіла распаўсюджваецца на прыватных асоб і прадпрымальнікаў».
Гандляваць свінінай забаранілі да асобага распараджэння райвыканкама.
Каментары