Прэзідэнт Украіны Віктар Януковіч абураны сілавым разгонам мірнага мітынгу на Майдане Незалежнасці, які адбыўся а -й раніцы 30 лістапада, паведамляе pravda.com.ua.
Пра гэта гаворыцца ў яго звароце да ўкраінскага народу, размешчаным на афіцыйным сайце.
«Я глыбока абураны тымі падзеямі, якія адбыліся ў ноч на Майдане Незалежнасці. Я асуджаю дзеянні, якія прывялі да сілавога супрацьстаяння і пакут людзей», — заявіў Януковіч.
Тым часам, адказнасць за разгон узяў на сябе начальнік кіеўскай міліцыі Валерый Корак.
Ён заявіў сёння ў час прэс-канферэнцыі, што асабіста загадаў задзейнічаць «Беркут» для разгону актывістаў Еўрамайдану ў Кіеве. Разам з тым, паводле яго слоў, міліцыя не была настроена на агрэсію, разгон Еўрамайдану быў справакаваны.
«Я запэўніваю, што міліцыя не была настроена на агрэсію і прымяненне сілы. Гэта ўсё было сітуацыйна. Сітуацыя была справакаваная», — сказаў ён.
Апазіцыя прызначыла на нядзелю, 12.00, Вялікае Народнае веча. Збор яго ўдзельнікаў адбудзецца каля помніка Тарасу Шаўчэнку.
Глядзі таксама: Патрыярх Кіеўскі: Мы маральна асуджаем жорсткае ўжыванне сілы да мірных грамадзянаў
Каментары