У Баку адбылася ўрачыстая цырымонія падпісання дамовы аб распрацоўцы газавага радовішча «Шах-Дэніз-2».
Газ з дна Каспія будзе дастаўляцца ў Еўропу праз Грузію, Турцыю і Грэцыю, паведамляе Бі-Бі-Сі.
Кансорцыум, які распрацоўвае «Шах-Дэніз-2» таксама пабудуе Трансадрыятычны газаправод з Грэцыі ў Італію.
Будаўніцтва магістралі будзе каштаваць не менш чым у 28 млрд даляраў. На цырымоніі падпісання дамовы прэзідэнт Азербайджана Ільхам Аліеў заявіў, што «Шах-Дэніз-2» «зменіць энергетычную карту рэгіёна. Азербайджанскі газ зараз будзе паступаць на рынкі, што маюць найбольшую ў ім патрэбу».
На думку аналітыкаў, рашэнне кансорцыума пабудаваць Трансадрыятычны газаправод забівае апошні цвік у труну еўрапейскага праекта газаправода «Набука», які павінен быў завяршацца ў Аўстрыі.
У кансорцыум уваходзяць кампаніі ВР (аператар праекта), Statoil (Нарвегія), SOCAR (Азербайджан), «Лукойл» (Расія), Total (Францыя), NIOC (Іран) і TPAO (Турцыя).
Праўда, Statoil нечакана заявіла, што скарачае сваю долю ў кансорцыуме з 25,5% да 15,5%.
Кансорцыум спадзяецца да 2019 года здабываць на «Шах-Дэніз-2» 16 млрд кубаметраў газу ў год. 6 мільярдаў дастануцца Турцыі і Грузіі, астатняе будзе паступаць у Еўропу.
На дадзены момант Еўрапейскі Саюз імпартуе 60% неабходнага яму прыроднага газу, больш за чвэрць — з Расіі.
На цырымонію падпісання ў Баку прыбыў міністр замежных спраў Вялікабрытаніі Уільям Хейг. Яго рашэнне прыехаць у Азербайджан рэзка раскрытыкавалі праваабаронцы.
Amnesty International заявіла, што «становішча з правамі чалавека ў Азербайджане жудаснае, і ўрад пачаў агрэсіўна душыць свабоду слова».
Прадстаўнік брытанскага МЗС са свайго боку заявіў, што Лондан рэгулярна абмяркоўвае пытанне аб правах чалавека з уладамі Азербайджана.
Паводле дадзеных Amnesty International, прыкладна палова замежных інвестыцый у Азербайджане паступае з Вялікабрытаніі, у асноўным з-за асваення ВР газавых радовішчаў на Каспіі.
У чым прычына незадаволенасці жыхароў мікрараёна Лебядзіны ў Мінску? Вось што насамрэч там планавалі будаваць6
Каментары