Лідары апазіцыі выступілі на Майдане як пераможцы.
Першым выступіў Віталь Клічко. Ён чытаў свой тэкст па паперцы. Ён заявіў, што патрабаванне датэрміновых прэзідэнцкіх выбараў застаецца ў сіле.
Другім выступіў былы міністр замежных справаў і віцэ-прэм'ер Пятро Парашэнка. Гэты ўкраінскі мільярдэр, уласнік кандытарскай імперыі «Рашэн» здаўна падтрымлівае праеўрапейскія і нацыянальныя сілы. Ён назваў прапановы Януковіча першым крокам да перамогі. Ён таксама пад авацыю Майдану падзякаваў за пазіцыю футбольным фанатам.
Трэцім слова меў Алег Цягнібок — лідар нацыяналістычнай партыі «Свабода». «Усе на Майдан!» — шэсць разоў паўтарыў ён у часе выступу. На ягоную думку, мусіць быць працягнуты ціск. Ён таксама заклікаў ствараць паралельныя структуры ўлады ў рэгіёнах.
Апошнім выступаў Арсень Яцанюк, якому Януковіч прапанаваў сфармаваць урад. Ён паведаміў, што гаворка ідзе пра тое, што апазіцыя зможа сфармаваць урад цалкам і павесці краіну да еўраінтэграцыі. Але заявіў, што пяць патрабаванняў да ўладаў застаюцца ў сіле. Пасада прэзідэнта павінна быць «знівеляваная», прэзідэнцкая рэспубліка — замененая парламенцка-прэзідэнцкай. І рашэнне па прапановах можа быць прынята толькі ў аўторак — па выніках пасяджэння Вярхоўнай Рады. Кампрамісу не можа быць без адмены «законаў 16 студзеня», якія абмежавалі грамадзянскія правы, і без амністыі палітвязням.
Тон выступаў на Майдане быў разняволены, аптымістычны. Але ў той жа час лідары сыходзілі ад ясных, недвухсэнсоўных адказаў.
Такім чынам, Майдан застаецца стаяць. Да аўторка напружанасць захаваецца, але факт, што Партыя рэгіёнаў і Януковіч пайшоў на саступкі.
Каментары