Расійскія вайскоўцы здымаюць блакаду ўкраінскіх вайсковых частак у Крыме. Паводле звестак «Украінскай праўды», грузавікі з расіянамі, якія блакавалі вайсковую частку ўкраінскай берагавой аховы ў Перавальным, ужо з'ехалі.
Акрамя таго, у Феадосіі расійская тэхніка і салдаты спынілі блакаванне ўкраінскай часткі марской пяхоты і адышлі ў бок часткі ЧФ РФ. Такая ж сітуацыя і ў Бахчысараі.
Кіраўнік Цэнтра ваенна-палітычных даследаванняў Дзмітрый Цімчук таксама пацвярджае інфармацыю аб зняцці блакавання ўкраінскіх ваенных частак расійцамі.
«Аднак на месцы застаюцца «турысты Пуціна». У Феадосіі яны палохаюць украінскіх марпехаў тым, што знойдуць і фізічна знішчаць іх сем'і. Не выключаны штурм», — адзначыў ён.
«Па некаторых дадзеных, ад'езд можа быць выкліканы ратацыяй падраздзяленняў расійскіх акупантаў (г.зн. на іх месца прыбудзе замена). Інфармацыя адсочваецца», — дадаў Цімчук.
Сакратар Рады нацыянальнай бяспекі і абароны Андрэй Парубій заявіў, што Расія спрабуе перадыслакаваць свае войскі ў Крым, каб місія АБСЕ не зафіксавала іх прысутнасці.
Як стала вядома пазней, блакада сапраўды неўзабаве аднавілася.
