Першыя чатыры станцыі трэцяй лініі плануюць пабудаваць да 2018-2019 гадоў. Яны дададуць метро адразу два перасадачныя вузлы. Мінчукам распавялі, колькі грошай выдаткуюць на будаўніцства метро ў гэтым годзе.
Летась на праектаванне і будаўніцтва першага ўчастка трэцяй лініі метро выдаткавалі каля 68 мільярдаў рублёў. Пра гэта паведаміў начальнік дырэкцыі па будаўніцтве Мінскага метрапалітэна Павел Царун.
У гэтым годзе на патрэбы трэцяй лініі выдаткуюць каля 981 мільярда рублёў. З іх 500 мільярдаў — крэдытныя рэсурсы, а 481 мільярд рублёў выдзелены з бюджэту Мінска.
Цяпер ідуць працы па першых чатырох станцыях трэцяй лініі («Вакзальная», «Кавальская слабада», «Юбілейная плошча», «Плошча Багушэвіча»), інжынерным корпусе і будынку абслуговага персаналу. Будаўнічая даўжыня ўчастка — 4,3 кіламетра, эксплуатацыйная — на кіламетр менш.
Павел Царун мяркуе, што нагрузка на чатыры станцыі ў пачатку эксплуатацыі будзе ад 10 да 20 тысяч пасажыраў у суткі, пасля будаўніцтва сямі станцый гэтыя лічбы, зразумела, павялічацца.
Спецыяліст адзначае, што «трэцяя лінія будзе вельмі сучаснай» як па аздабленні, так і па праектных рашэннях. Напрыклад, па праекце на ўсіх станцыях гэтай лініі будзе ахоўны экран. Экраны на платформах не дазволяць пасажырам падаць на рэйкі. Цягнікі на новай лініі змогуць рухацца ў аўтаматычным рэжыме (машыністы будуць толькі кантраляваць працэс). Даўжыня платформы прадугледжваецца з улікам саставаў з пяці вагонаў метро.
У вестыбюлях новых станцый і на ўваходных зонах абяцаюць выкарыстоўваць плітку «Керамін», як ужо рабілі на самых «свежых» станцыях мінскага метро. Падлогі — гранітныя, таму што «гэта матэрыял, якому няма альтэрнатывы па зносаўстойлівых характарыстыках».
Доўгачаканы аўтаматызаваны праходчы шчыт дырэкцыя па будаўніцтве сталічнай падземкі плануе атрымаць у жніўні. Пры гэтым Павел Царун тлумачыць, што яшчэ два месяцы зойме зборка шчыта.
Трамвайны рух у раёне вакзала, закрыты з-за перакладкі камунікацый, адкрыюць у чэрвені, але зноў закрыюць у канцы лета — зноў жа з-за патрэб трэцяй лініі метро.
Каментары