Фіналіст праекту Mars One распавёў пра недахоп грошай і слабую арганізацыю праекту.
Прыватны праект Mars One, у межах якога плануецца адсылаць групы людзей на Марс, мае багата хібаў, распавёў прафесар Джозэф Рош (Joseph Roche), адзін з фінальных кандыдатаў на палёт.
Паводле слоў патэнцыйнага марсіяніна, фінансаванне праекта плануецца атрымаць з дапамогай саміх удзельнікаў.
Кандыдаты на ўдзел у Mars One мусілі набіраць балы, якія выдаваліся за пакупку тавараў пад брэндам Mars One альбо прамых ахвяраванняў. Таксама прапаноўвалася згаджацца атрымліваць ад журналістаў ганарары за інтэрв’ю, але ахвяраваць у праект 75% тых ганарараў.
Рош сцвярджае, што апублікаваны The Guardian топ удзельнікаў праекту насамрэч ёсць топам ахвяравальнікаў грошай.
Mars One не праводзілі медагляд кандыдатаў.
Замест абяцаных шматгадзінных асабістых сумоўяў і псіхалагічных тэстаў Рош прайшоў толькі 10-хвіліннае сумоўе з галоўным медыцынскім спецыялістам праекта. Медагляд кандыдаты мусілі арганізаваць для сябе самастойна. Ні з кім з праекту Рош не сустракаўся асабіста.
Рош згадвае, што яшчэ да яго заяў было вядома, што праект Mars One ужо не падтрымліваецца тэлекампаніяй Endemol, а фізік Герард Хофт (Gerard 't Hooft), які некалі ўваходзіў у лік дарадцаў праекту, ацаніў рэалістычныя тэрміны адпраўкі чалавека на Марс у сто год, а не дзесяць. Таксама было вядома, што ў праект падалі заяўкі 2700 чалавек, а не 200 тысяч, як заяўлялі арганізатары Mars One.
Джозэф баіцца, што правал Mars One праз такую арганізацыю можа падарваць веру чалавецтва ў касмічныя праекты энтузіястаў.
Абвяржэнняў слоў Роша ад іншых удзельнікаў ці арганізатараў праекту пакуль не паступала.
***
Mars One — прыватны праект, што прадугледжвае заснаванне калоніі на Марсе, якая да 2035 года мусіць дасягнуць насельніцтва ў 44 чалавекі. Фінансаванне плануецца атрымаць ад спонсараў і паказу праекту па тэлебачанні ў форме рэаліці-шоў.
У 2018 годзе праект Mars One плануе адаслаць на Марс беспілотны даследчы апарат, у 2020-м — марсаход, у 2022-м — грузавы карабель. Старт першай каманды людзей прызначаны на красавік 2024 года, наступная каманда меркавана паляціць у 2026 годзе. Сам палёт зойме каля 210 дзён. Вяртанне першых марсіян на Зямлю не прадугледжанае.
Беларусаў сярод фіналістаў праекту няма.
Цяпер чытаюць
«Адгукнуўся на 95% аб'яў — і ўсе адмовілі». Расіяніну не хочуць здаваць кватэру ў Гродне12
Каментары