Finalist prajektu Mars One raspavioŭ pra niedachop hrošaj i słabuju arhanizacyju prajektu.
Pryvatny prajekt Mars One, u miežach jakoha płanujecca adsyłać hrupy ludziej na Mars, maje bahata chibaŭ, raspavioŭ prafiesar Džozef Roš (Joseph Roche), adzin ź finalnych kandydataŭ na palot.
Pavodle słoŭ patencyjnaha marsijanina, finansavańnie prajekta płanujecca atrymać z dapamohaj samich udzielnikaŭ.
Kandydaty na ŭdzieł u Mars One musili nabirać bały, jakija vydavalisia za pakupku tavaraŭ pad brendam Mars One albo pramych achviaravańniaŭ. Taksama prapanoŭvałasia zhadžacca atrymlivać ad žurnalistaŭ hanarary za intervju, ale achviaravać u prajekt 75% tych hanararaŭ.
Roš śćviardžaje, što apublikavany The Guardian top udzielnikaŭ prajektu nasamreč jość topam achviaravalnikaŭ hrošaj.
Mars One nie pravodzili miedahlad kandydataŭ.
Zamiest abiacanych šmathadzinnych asabistych sumoŭjaŭ i psichałahičnych testaŭ Roš prajšoŭ tolki 10-chvilinnaje sumoŭje z hałoŭnym miedycynskim śpiecyjalistam prajekta. Miedahlad kandydaty musili arhanizavać dla siabie samastojna. Ni z kim z prajektu Roš nie sustrakaŭsia asabista.
Roš zhadvaje, što jašče da jaho zajaŭ było viadoma, što prajekt Mars One užo nie padtrymlivajecca telekampanijaj Endemol, a fizik Hierard Choft (Gerard 't Hooft), jaki niekali ŭvachodziŭ u lik daradcaŭ prajektu, acaniŭ realistyčnyja terminy adpraŭki čałavieka na Mars u sto hod, a nie dziesiać. Taksama było viadoma, što ŭ prajekt padali zajaŭki 2700 čałaviek, a nie 200 tysiač, jak zajaŭlali arhanizatary Mars One.
Džozef baicca, što pravał Mars One praz takuju arhanizacyju moža padarvać vieru čałaviectva ŭ kaśmičnyja prajekty entuzijastaŭ.
Abviaržeńniaŭ słoŭ Roša ad inšych udzielnikaŭ ci arhanizataraŭ prajektu pakul nie pastupała.
***
Mars One — pryvatny prajekt, što praduhledžvaje zasnavańnie kałonii na Marsie, jakaja da 2035 hoda musić dasiahnuć nasielnictva ŭ 44 čałavieki. Finansavańnie płanujecca atrymać ad sponsaraŭ i pakazu prajektu pa telebačańni ŭ formie realici-šoŭ.
U 2018 hodzie prajekt Mars One płanuje adasłać na Mars bieśpiłotny daśledčy aparat, u 2020-m — marsachod, u 2022-m — hruzavy karabiel. Start pieršaj kamandy ludziej pryznačany na krasavik 2024 hoda, nastupnaja kamanda mierkavana palacić u 2026 hodzie. Sam palot zojmie kala 210 dzion. Viartańnie pieršych marsijan na Ziamlu nie praduhledžanaje.
Biełarusaŭ siarod finalistaŭ prajektu niama.
Ciapier čytajuć
U dzień, kali pamiłavali palitviaźnia Daronina, jahonaj žoncy prysudzili 8,5 hadoŭ kałonii za ŭdzieł u dvarovym čacie4
Kamientary