Сьледам за Жалезьнічэнкам гэта робіць студэнт Акадэміі кіраваньня пры прэзыдэнце Юрась Алейнік.
Хлопец вучыўся на факультэце дзяржаўнага кіраваньня эканомікай Акадэміі кіраваньня пры прэзыдэнце, але 15 траўня яго адлічылі з ВНУ. Афіцыйная прычына — «сыстэматычныя парушэньні вучэбнай дысцыпліны і правілаў унутранага распарадку». Сам хлопец лічыць, што гэта было зьвязана зь ягонай грамадзкай пазыцыяй.
Юрась доўгі час спрабаваў адстаяць свае правы ў судах, аднак прадстаўнікі Фэміды ня сталі на бок адлічанага студэнта. Урэшце, восеньню Алейнік зьехаў у Маскву, каб працягнуць вучобу ў Дзяржаўным унівэрсытэце "Вышэйшая школа эканомікі".
Нядаўна хлопцу прыйшла павестка зьявіцца ў маладэчанскі ваенкамат, каб прайсьці мэдычны надгляд для прызыву ў войска. Камісію ў Маладэчне Алейнік прайшоў, але яго накіравалі на дадатковае абсьледаваньне ў Менск.
У ваенкамат Юрась прыехаў зь лістом ад кіраўніка Савету замежнай і абароннай палітыкі Расейскай Фэдэрацыі Сяргея Караганава, які адначасова зьяўляецца і дэканам факультэту ўсясьветнай эканомікі і міжнароднай палітыкі Вышэйшай школы эканомікі, дзе навучаецца Юрась Алейнік. Караганаў просіць даць хлопцу адтэрміноўку, і прызваць яго ўжо пасьля сканчэньня курсу навучаньня.
«У ваенкамаце мне заявілі, што ніякіх падставаў даваць мне адтэрміноўку ў іх няма, — кажа Ю.Алейнік. — Сказалі, што ў зімовы прызыў я ўжо не трапляю па тэрмінах, таму нацягнуць боты давядзецца летам».
Алейнік спадзяецца, што справу ўсё ж атрымаецца вырашыць мірна. «Калі не, то буду патрабаваць службы ў беларускамоўнай частцы, як гэта ўжо рабіў Зьміцер Жалезьнічэнка. Гэта ўжо ня будзе прэцэдэнт, а будзе тэндэнцыя зь якой уладам давядзецца лічыцца», — кажа Ю.Алейнік.
Каментары