Старшыня беларускіх «Начных ваўкоў»: Палякі нас падтрымалі, а вы можаце далучыцца пад БЧБ сцягам

Мяркуецца, што ўдзельнікі прабегу праедуць шляхам Чырвонай арміі ад Масквы да Берліна праз тэрыторыі еўрапейскіх дзяржаў.

Аднак на такія намеры вельмі адмоўна адрэагавалі некаторыя еўрапейскія палітыкі і прадстаўнікі мотаруху — палякі дык увогуле абяцаюць сустрэць расійскіх байкераў на мяжы з Беларуссю і гвалтоўна спыніць.

З гэтай нагоды «Наша Ніва» пагутарыла са старшынёй беларускай філіі «Начных ваўкоў» Аляксеем Вакульчыкам, які са свайго боку крыху патлумачыў сітуацыю.

Аляксей адразу пачаў з таго, што СМІ, на ягоную думку, няправільна падаюць сітуацыю.

«Зразумейце, што па-першае — не «Начныя ваўкі» арганізатары прабегу, а расійская матацыклісты ўвогуле. Калі казаць аб асобах, то гэта Андрэй Баброўскі, а ніякі не «Хірург». Увогуле такія прабегі ладзяцца штогод, але сёлета арганізатары проста папрасілі рэкламу — мы пераставілі гэтую інфармацыю на свой сайт і тут пачалося…», — кажа Аляксей.

«Калі выйшаў той артыкул, дзе сцвярджалася, нібыта прабег усе байкатуюць, мне адразу пачалі тэлефанаваць узгаданыя журналістам людзі і казаць, што іх не так зразумелі. Вось кіраўнік RacingClan’а, напрыклад, увогуле прапанаваў сваю дапамогу ва ўзгадненні прабегу з ДАІ і выканкамамі. А віцебскі клуб RoadDogs будзе ўдзельнічаць у прабегу. Што ж датычыць «Дацэнта» з IronBrothers, то я ведаю аб ягоных палітычных поглядах, але мы ўсё роўна ў выдатных адносінах. Таму прыблізная колькасць беларускіх байкераў, якія будуць суправаджаць калону – дзесьці 30 чалавек на сённяшні дзень».

Таксама са словаў Аляксея вынікае, што ён шчыра не разумее, чаму прабег выклікаў такую негатыўную рэакцыю з боку грамадства і СМІ.

«Мне ўвогуле не зразумелая пазіцыя некаторых людзей, якія заклікаюць неяк нам перашкодзіць, пабіць там ці яшчэ што. Асабліва заява гэтага Мікіты Сямяненкі — гэта ж смешна, ён увогуле хто? 20 гадоў катаюся на матацыкле, а гэтае прозвішча ўпершыню чую.

Бо я магу вас запэўніць, што палякі якраз нас падтрымліваюць: на наш мэйл прыходзяць лісты ад уладальнікаў прыдарожных рэстаранаў з прапановамі размясціць і накарміць удзельнікаў прабегу, а польскія матацыклісты [пераважна «левыя», «правыя» супраць прабегу — НН] прынялі рэзалюцыю, згодна з якой абяцаюць суправаджаць расійскіх байкераў у межах сваёй краіны.

Таму гэтыя пагрозы неяк спыніць прабег — гэта несур’ёзна. Ну скажыце, які адэкватны чалавек будзе правакаваць бойку на дарозе? Мне гэта здаецца неймаверным».

Разам з тым Аляксей падкрэсліў, што ягонае сэрца б’ецца з боку Луганска, а не Кіева.

— Нас называюць тэрарыстамі, сепаратыстамі, але хіба любіць расійскі і беларускі народы — гэта сепаратызм? Што да Украіны, то тут у мяне, канешне, свая пазіцыя, але прычым тут прабег? – сказаў старшыня беларускіх «Начных ваўкоў».

Байкер мяркуе, што пэўныя людзі, называючы іх тэрарыстамі, маюць мэту раскалоць беларускае грамадства на ўзор украінскага.

«Мы [беларускія «Начныя ваўкі» – НН] ніякія не сепаратысты.

Увогуле, ведаючы пазіцыю вашай газеты, я і гавару з вамі толькі таму, што не хачу паддавацца пэўным тэндэнцыям і дзяліць беларусаў на сваіх і чужых, правільных і няправільных. Гэта, як паказаў досвед Украіны, можа кепска скончыцца.

Вось вы гаворыце па-беларуску? — Цудоўна, гаварыце. Паважаю людзей, якія маюць нейкую ідэю, але падкрэслю — светлую ідэю.

Бо нашай мовай і сімваламі, чаго тут хаваць, часта карыстаюцца не з любоўю, а з карысцю і прагай да нейкіх дывідэндаў. Таму, калі хтосьці ў калоне шчыра захоча праехаць з Бела-Чырвона-Белым сцягам — я асабіста і мае паплечнікі не будуць супраць. Хай едзе, калі ў ягонай душы Беларусь атаесамляецца з гэтымі колерамі, ні ў Пагоні, ні ў БЧБ няма нічога кепскага», — скончыў Аляксей.

• 0
• 0
• 0
• 0
• 0
• 0
• 0
• 0