Аб'яднаная грамадзянская партыя (АГП) просіць у выбаршчыкаў прадаставіць прэтэндэнту на ролю кандыдата ў прэзідэнты, свайму лідару Анатолю Лябедзьку крэдыт даверу, узяўшы ўдзел у фінансаванні яго выбарчай кампаніі, а таксама ў валанцёрскай працы. Аб гэтым было заяўлена 28 красавіка ў Мінску на прэс-канферэнцыі кіраўніцтва партыі.
Лабедзька нагадаў, што з'езд АГП яшчэ ў маі мінулага года прыняў рашэнне вылучаць яго кандыдатам у прэзідэнты на выбарах 2015 года. Сёння гэтае рашэнне было пацверджана палітсаветам арганізацыі.
Палітык паведаміў, што фарміраванне ініцыятыўнай групы кандыдата ў прэзідэнты будзе праходзіць на валанцёрскіх пачатках. «Ужо даўно ў Беларусі не праводзіліся выбарчыя кампаніі не за грошы. Мы будзем звяртацца да людзей, якія зацікаўлены ў пераменах, прасіць у іх крэдыт палітычнага даверу», — сказаў ён.
Паводле слоў Лябедзькі, АГП кіравалася некалькімі аргументамі, прымаючы рашэнне ўдзельнічаць у выбарчай кампаніі гэтага года. Па-першае, у партыі ёсць палітычная воля не дапусціць легітымізацыі вынікаў выбарчай кампаніі без правядзення справядлівых выбараў. Па-другое, адзначыў палітык, АГП гатова рабіць усё, каб «не здаць палітычны і эканамічны суверэнітэт» Беларусі. Па-трэцяе, партыя спадзяецца выйсці на фарміраванне шырокага руху для змянення сітуацыі ў краіне.
Лябедзька таксама падкрэсліў, што падчас выбарчай кампаніі яго каманда не збіраецца падстройвацца пад «трэнды ні ўлады, ні Усходу, ні Захаду». «Мы не гатовы дамаўляцца з уладамі ўзамен на нейкія прэферэнцыі падчас парламенцкіх выбараў 2016 года», — сказаў ён.
Лябедзька праінфармаваў, што сёння было прынята рашэнне аб прызначэнні кіраўніком выбарчага штаба намесніка старшыні партыі Льва Марголіна, кіраўніком ініцыятыўнай групы па зборы подпісаў — члена палітсавета Віктара Карняенкі.
Лябедзька адзначыў, што сёлета яму, як апазіцыйнаму кандыдату, будзе складана прайсці «рубікон рэгістрацыі». «Верагодна, на гэтых выбарах улады не будуць так лаяльна падыходзіць да рэгістрацыі кандыдатаў у прэзідэнты. Але нават калі нас зарэгіструюць, мы пакідаем за сабой поле палітычнага манеўра. Мы ў любы момант можам зняцца з выбарчай кампаніі», — сказаў ён.
Каментары