BMW з расійскімі нумарамі знёс прыпынак каля Нацыянальнай бібліятэкі ў Мінску і з'ехаў з месца ДТЗ ФОТЫ
Аварыя адбылася днём 30 чэрвеня на сталічным праспекце Незалежнасці.
BMW ехаў па праспекце ў бок Уручча. У нейкі момант аўтамабіль паскорыўся, яго раскруціла і вынесла на паласу сустрэчнага руху, пасля чаго ён выскачыў на тратуар, дзе ўрэзаўся ў прыпынак. Кіроўца BMW некаторы час пастаяў на месцы аварыі, пасля чаго збег.
Паводле папярэдняй інфармацыі, у момант аварыі людзей на прыпынку не было. У ДТЗ ніхто не пацярпеў.
На месцы здарэння працуюць супрацоўнікі ДАІ.
У ДАІ Першамайскага раёна распавялі, што на аўтамабілі ўсталяваны рэгістрацыйны знак «у888нк 66 rus». Інспектары просяць усіх, каму нешта вядома пра месцазнаходжанне кіроўцы або аўтамабіля, патэлефанаваць на 222-17-17 (дзяжурная частка ДАІ Мінска) або 102.
Каментары