Псіх.
Marvel і 20th Century Fox прадставілі трэйлер свайго самага брутальнага супергеройскага фільма дзесяцігоддзя — «Дэдпул».
Дэдпул — антыгерой, найміт, які бярэцца забіваць усіх, хто «таго варты». Ён бессмяротны і можа літаральна сабраць сябе па кавалках. Ён надзвычай балбатлівы — і да таго ж разумее, што жыве ў коміксах ці фільме.
Сябе ён добра прадставіў у тызеры, што папярэднічаў трэйлеру.
Рэжысёрам фільма стаў Цім Мілер, які раней здымаў толькі кароткаметражкі. Галоўную ролю выканае Раян Рэйнальдс. Сусветная прэм’ера прызначаная на 12 лютага 2016 года, у нас фільм можа выйсці на дзень раней.
Ідэя экранізацыі «Дэдпула» нарадзілася яшчэ ў 2004 годзе, Рэйнальдс з самага пачатку заяўляў, што хоча выканаць галоўную ролю. Але склалася іначай: Дэдпул у выкананні Рэйнальдса з’явіўся ў спін-офе «Людзей Ікс», фільме «Людзі Ікс. Пачатак. Расамаха», дзе прадстаў у абсалютна некананічным вобразе, што меў мала агульнага з коміксам і быў успрыняты фанатамі халодна. У 2010 годзе праца над уласным фільмам «Дэдпула» была адноўленая, новая стужка будзе ігнараваць «Расамаху» і стане дастаткова блізкай да коміксаў, Рэйнальдс захавае ролю Дэдпула.
Фільм стане першай стужкай Marvel з рэйтынгам «18+» з часоў «Карніка» 2004 года.
***
Дэдпул — адносна малады супергерой, з’явіўся ў коміксах толькі ў 1991 годзе як адна з ахвяр эксперыменту «Зброя Ікс» у сусвеце «Людзей Ікс». Атрымаў уласную серыю коміксаў у 1997 годзе, хутка набраў папулярнасць (у тым ліку дзякуючы таму, што персанаж разумеў, што жыве ў коміксе). Нягледзячы на маладосць, рэгулярна трапляе ў спісы найлепшых персанажаў коміксаў, мае багата фанатаў.
Каментары