У Барысаве перабудуюць кінатэатр побач з саборам. На фасадзе чытаецца брыдкае слова з трох літар
Савецкі кінатэатр «Перамога» хочуць ператварыць у ЗАГС, але некаторыя аспекты рэканструкцыі выклікаюць пытанні.
Аддзел архітэктуры і будаўніцтва Барысаўскага райвыканкама прадставіў новы праект інстытута «Барысаўпраект» па рэканструкцыі кінатэатра «Перамога» ў ЗАГС. Мясцовая газета паведаміла пра пачатак грамадскага абмеркавання праекта, аднак тэрміны абмеркавання не былі названыя.
Кінатэатр «Перамога» быў пабудаваны ў 1965 годзе па тыповым праекце 2С-06-14, распрацаваным у СССР. Кінатэатры гэтай серыі былі вельмі распаўсюджанымі на тэрыторыі Савецкага Саюза і часта сустракаюцца ў раённых цэнтрах Беларусі.
Цяпер у «Перамозе» размешчаны Раённы цэнтр народнай творчасці, праходзяць культурныя мерапрыемствы, працуюць творчыя студыі і гурткі па інтарэсах. Адзіным дзеючым кінатэатрам у Барысаве на сёння застаецца «Кастрычнік».
Размешчаны побач з былым кінатэатрам Васкрасенскі сабор мае статус помніка архітэктуры. У 2020 годзе Міністэрства культуры зацвердзіла для яго праект зон аховы, паводле якога кінатэатр «Перамога» — гэта дысгарманічны будынак, які псуе ўспрыманне помніка.
Падаецца, праект рэканструкцыі не выправіць гэту сітуацыю. У сацсетках заўважылі, што на абноўленым фасадзе яскрава чытаецца слова «х*й», утворанае перфараванымі металічнымі панэлямі.
У 2019 годзе Барысаўскі райвыканкам ужо праводзіў грамадскія абмеркаванні рэканструкцыі кінатэатра «Перамога». Тады ад жыхароў горада не паступіла заўваг і прапаноў. За гэты час праект быў істотна перапрацаваны.
Паводле апублікаванай інфармацыі, акрамя рэканструкцыі самога будынка, плануецца добраўпарадкаванне вуліц III Інтэрнацыянала і Лапаціна, што знаходзяцца каля Свята-Васкрасенскага сабора.
Праект прадугледжвае стварэнне тратуараў, пешаходных пераходаў і азеляненне тэрыторыі. На добраўпарадкаванай тэрыторыі з'явяцца лаўкі, урны, веласіпедныя стойкі.
Каментары