Форвард зборнай Беларусі Канстанцін Кальцоў заключыў кантракт з мінскім «Дынама».
34-гадовы мінчук — выхаванец хакейнай школы «Юнацтва», дзе і выступаў аж да 1998 года ў розных узроставых катэгорыях.
Затым два сезоны правёў у складзе чарапавецкай «Северсталі» з расійскай Суперлігі. Тады ж адбыўся і яго дэбют на міжнароднай арэне — за юнацкую, маладзёжную, а затым і за асноўную нацыянальныя каманды Беларусі. На сваім першым «дарослым» сусветным першынстве Канстанцін адыграў 6 матчаў. Усяго на рахунку форварда — удзел у васьмі чэмпіянатуах свету сярод каманд элітнага дывізіёна (2005, 2007, 2008, 2009, 2010, 2012, 2013, 2014 гг.), А таксама дзве Алімпіяды: у Солт-Лэйк-Сіці і Ванкуверы.
У 1999 годзе Кальцоў быў выбраны «Пітсбург Пінгвінз» у 1-м раўндзе драфту НХЛ пад 18-м нумарам. Усяго за сваю кар'еру ў Нацыянальнай хакейнай лізе Кальцоў правёў 144 матчы, у якіх набраў 38 (12+26) бамбардзірскіх балаў.
Сезон-2004/05 стаў знакавым момантам для ўсяго хакейнага свету — бо менавіта тады ў НХЛ здарыўся лакаўт, на час якога Кальцоў часова «пераехаў» у «Дынама-Мінск». Тут форвард адыграў у 11 гульнях і зарабіў 8 (6+2) ачкоў. У далейшым, зрэшты, зноў змяніў прапіску на маскоўскі «Спартак», дзе і прабыў да заканчэння энхаэлаўскай «паўзы».
Ужо ў наступным годзе Канстанцін вярнуўся ў склад «пінгвінаў», аднак ён і стаў для яго апошнім за акіянам. Наступны перыяд у кар'еры нападніка прайшоў пад эгідай уфімскага «Салавата Юлаева» — менавіта тут і адбыўся яго дэбют у КХЛ. Толькі ў сакавіку 2012 года кантракт з Уфой быў скасаваны па ўзаемнай згодзе. А праз тры месяцы Кальцоў падпісаў кантракт з падмаскоўным «Атлантам», з якога быў абмяняны ў казанскі «Ак Барс» у снежні 2014-га.
Цяперашні сезон Кальцоў павінен быў пачынаць у ХК «Сочы», аднак з-за эпапеі са статусам у Лізе беларускіх гульцоў вырашыў у чарговы раз змяніць абстаноўку і паспрабаваць свае сілы ў Мінску, у сталічным «Дынама».
Цяпер чытаюць
У 2021 годзе выпускніца адмовілася паціснуць руку Гігіну на ўручэнні дыплома. Цяпер БДУ не хоча яго пацвярджаць7
Каментары