Дарадца Ціханоўскай паабяцаў дзейнічаць загадзя ў выпадку забароны расіянам турыстычных віз у ЕС

У беларусаў узнікае пытанне, якое ўжо неаднаразова гучала пасля пачатку поўнамаштабнай вайны: ці не могуць новыя меры рана ці позна закрануць і нас?

Еўропа рыхтуе новы этап абмежаванняў

Пасля пачатку поўнамаштабнай вайны Расіі супраць Украіны Еўрасаюз ужо значна ўскладніў атрыманне шэнгенскіх віз для расіян. У 2022 годзе было цалкам прыпынена дзеянне пагаднення аб спрашчэнні візавага рэжыму паміж ЕС і Расіяй. Гэта зрабіла працэдуру доўгай, дарагой і складанейшай.

У лістападзе 2025 года Еўракамісія пайшла яшчэ далей: расіяне фактычна страцілі магчымасць атрымліваць шматразовыя шэнгенскія візы. Цяпер у большасці выпадкаў ім трэба падавацца на новую візу перад кожнай паездкай.

У пачатку чэрвеня Швецыя, Літва, Латвія, Эстонія, Польшча, Данія, Фінляндыя, Чэхія, Нідэрланды, а таксама Ісландыя і Нарвегія выступілі за новыя абмежаванні для расійскіх турыстаў. Іх аргумент — пытанні бяспекі і неабходнасць пазбавіць расіян магчымасці спакойна ездзіць у Еўропу, пакуль працягваецца вайна ва Украіне.

У Бруселі ўжо пацвердзілі, што рыхтуюць новыя прапановы па ўзмацненні візавага рэжыму для грамадзян Расіі. Праўда, пакуль гаворка ідзе пра мэтавыя абмежаванні, а не пра поўную забарону.

Ці могуць пад удар трапіць беларусы?

Пакуль што ніякіх рашэнняў адносна грамадзян Беларусі няма.

Дарадца Святланы Ціханоўскай па пытаннях дыпламатыі Дзяніс Кучынскі адзначыў у каментары «Нашай Ніве», што апошнія гады Еўрасаюз паслядоўна прытрымліваецца прынцыпу аддзялення беларускага народа ад рэжыму Лукашэнкі і беларусаў ад расіян.

Павялічыць

«Гэта адзін з найважнейшых вынікаў працы дэмакратычных сіл пасля лютага 2022 года — нам удалося данесці да еўрапейскіх партнёраў, што Беларусь і беларусы не роўныя рэжыму, які служыць Крамлю і ўцягвае нашу краіну ў чужую вайну», — адзначае ён.

Разам з тым Дзяніс Кучынскі прызнае: паводзіны беларускага рэжыму робяць такія дыскусіі ўсё больш складанымі.

«Падтрымка расійскай агрэсіі, гібрыдныя атакі супраць суседзяў, выкарыстанне міграцыі як зброі, засыланне агентаў у краіны ЕС і стварэнне пагроз для нацыянальнай бяспекі працягваюць ствараць дадатковыя рызыкі. Таму пытанне захавання асобнага падыходу да беларусаў патрабуе пастаяннай увагі і працы з нашымі еўрапейскімі партнёрамі», — кажа дарадца Ціханоўскай.

Паводле яго слоў, цяпер няма ніякіх рашэнняў аб распаўсюджванні магчымых новых абмежаванняў для расіян на грамадзян Беларусі.

«Мы будзем і надалей настойваць, што беларусаў нельга караць за дзеянні нелегітымнага рэжыму. Наадварот, магчымасць выязджаць у Еўропу, атрымліваць адукацыю, падтрымліваць сувязі з дэмакратычным светам — гэта інвестыцыя ў будучыню свабоднай Беларусі», — падкрэсліў Дзяніс Кучынскі. 

Для многіх беларусаў шэнгенская віза дае магчымасць вучыцца, працаваць, падтрымліваць сувязь з роднымі, удзельнічаць у міжнародных праектах, атрымліваць абарону ад пераследу або проста не апынуцца адрэзанымі ад Еўропы. Таму любая новая дыскусія пра візавыя абмежаванні выклікае трывогу.

Дзяніс Кучынскі кажа, што ўжо ў найбліжэйшы час плануе абмеркаваць гэтае пытанне з нямецкімі палітыкамі: «Я буду мець кансультацыі з нямецкімі калегамі і абавязкова ўздыму гэтае пытанне ў сваіх размовах, у тым ліку з камандай канцлера і партыяй ХДС. Важна, каб Германія і надалей захоўвала адкрытасць для беларусаў».

Дарэчы, Германія застаецца адной з найважнейшых краін Шэнгенскай зоны для беларусаў. Паводле дадзеных нямецкай амбасады ў Мінску, у 2025 годзе беларусам было выдадзена каля 42 тысяч шэнгенскіх віз, што робіць Германію адным з галоўных візавых кірункаў для грамадзян Беларусі. 

• 13
• 2
• 2
• 1
• 0
• 0
• 0
• 2