PAP
Прэм'ер-міністр Польшчы Беата Шыдла пасля завяршэння саміта ЕС — Турцыя заявіла, што Польшча не пагодзіцца на прыняцце новых квот мігрантаў.
Кіраўнік польскага ўрада на прэс-канферэнцыі ў Брусэлі пазітыўна ацаніла прыняты на саміце план па пытанні ўрэгулявання міграцыйнага крызісу і сказала, што Польшча актыўна прымала ўдзел у яго падрыхтоўцы.
«Мы прынялі рашэнне аб тым, што міграцыйны крызіс неабходна спрабаваць вырашаць, перш за ўсё, за межамі Еўрапейскага саюза. Адначасова ўзмацніць кантроль на знешніх межах ЕС і, вядома, даць гуманітарную дапамогу. Мы пагадзіліся, што на гэтыя мэты будуць выдзеленыя фінансавыя сродкі», — падкрэсліла Беата Шыдла.
Пры гэтым Беата Шыдла адзначыла, што Варшава не прыме новы план падзелу мігрантаў. «У сваім выступе я таксама падкрэсліла, што мы не згодныя на прыняцце новых квот. І такая пазіцыя гучала ў большасці выступленняў», — адзначыла кіраўнік польскага ўрада.
