Берасцейка спрабавала пранесці ў калонію наркотыкі ў інтымным месцы

Жыхар Брэста Іван (тут і далей усе імёны змененыя) з наркотыкамі пасябраваў даўно. Таму неаднаразова прыцягваўся да крымінальнай адказнасці па артыкуле «Незаконны абарот наркатычных сродкаў». У апошні раз ён быў вызвалены пасля адбыцця пакарання, маючы нязнятую і непагашаную судзімасць. Аднак на шлях выпраўлення стаць не захацеў, а абраў звыклую для сябе злачынную дарожку.

Разам са сваёй сужыцелькай Ганнай, якая таксама прыцягвалася да адказнасці за аналагічнае злачынства, Іван вярнуўся да старой дзейнасці. На працягу каля сямі месяцаў няўдачлівыя дзялкі паспелі прарабіць немалую працу. Яны не толькі набывалі, але і самастойна выраблялі і рэалізоўвалі наркатычныя і псіхатропныя рэчывы. Па месцы жыхарства фігурантаў крымінальнай справы былі знойдзеныя марыхуана, ацэтыляваны і экстракцыйны опій, розныя таблеткі і вырабленыя з іх прэпараты… Таксама ў ходзе следства вызначаныя трое грамадзян (жыхары Брэста, Жабінкі і Драгічына), якім рэалізоўваліся наркотыкі. Зрэшты, частку небяспечных рэчываў абвінавачаныя ўжылі самі.

Але найбольшую цікавасць у крымінальнай справе выклікае эпізод, звязаны са спробай наладзіць дастаўку наркотыкаў у выпраўленчую калонію. Менавіта там адбываў пакаранне патэнцыйны спажывец прадукту, вырабленага злачыннай парачкай.

Для правядзення аперацыі Іван і Ганна прыцягнулі трэціх асоб — сваіх знаёмых Ігара і Ірыну. Аднак у падрабязнасці вырашылі іх не прысвячаць, проста папрасілі даставіць палімерны пакет са скруткам на тэрыторыю папраўчай установы. Пасылка ўтрымоўвала цікавае начынне: там знаходзіліся марыхуана масай 2,74 грама і парашкападобнае рэчыва, якое змяшчае ў сваім складзе небяспечны псіхатроп — псеўдаэфедрын, масай 3,6 грама. Ігар перадаў на чыгуначным вакзале пакет Ірыне, якая і даставіла яго, папярэдне схаваўшы ў інтымным месцы, на тэрыторыю калоніі. Аднак доўгачаканага спаткання не адбылася: жанчыну затрымалі супрацоўнікі міліцыі, канфіскавалі скрутак з небяспечнымі рэчывамі.

А галоўныя фігуранты крымінальнай справы паўсталі перад судом. У жніўні 2015 суд Ленінскага раёна Брэста прызначыў Івану 13 гадоў пазбаўлення волі, а яго хаўрусніцы Ганне — 11 гадоў пазбаўлення волі. 

• 0
• 0
• 0
• 0
• 0
• 0
• 0
• 0