У Мінску маладая маці, што ехала з дзіцём, напала на кантралёрку. Ёй далі гіганцкі штраф
На выязным судовым пасяджэнні, якое прайшло ў будынку «Белпошты», разгледзелі крымінальную справу супраць 29-гадовай жыхаркі Мінскага раёна, якую абвінавацілі ў гвалце ў адносінах да службовай асобы, пішуць Мінск-навіны.
Жанчына вечарам ехала ў аўтобусе №127. Паколькі яе дзіця знайшло ў салоне пракампасціраваны білет, жанчына, відаць, вырашыла зэканоміць і не плаціць за праезд.
На прыпынку «Шэйпічы» ў салон зайшлі кантралёры, яна прад’явіла ім знойдзены білет, які аказаўся пракампасціраваным двойчы — першы раз яшчэ раніцай. Кантралёрка паведаміла ёй пра гэта, маладая маці накіравалася да выхаду.
Аднак пакідаць салон яна не спяшалася: дачакаўшыся, пакуль кантралёры выйдуць на вуліцу, засталася ў аўтобусе. Тыя папрасілі кіроўцу адкрыць пярэднія дзверы, падышлі да безбілетніцы і запатрабавалі прайсці з імі для складання пратакола. Жанчына адмовілася і пачала гучна крычаць, абражаючы кантралёрку, тая выклікала міліцыю.
На прыпынку «Трасцянецкая» безбілетніца ўсё ж выйшла з аўтобуса і хуткім крокам накіравалася ў бок аўтавакзала «Усходні». Работніца «Мінсктранса» пайшла за ёй, патрабуючы спыніцца і дачакацца нарада. Жанчына азірнулася і, нецэнзурна выказваючыся, схапіла кантралёрку за валасы, моцна пацягнуўшы ўніз.
Яе затрымалі і даставілі ў Ленінскі РАУС для далейшага разбіральніцтва. У дачыненні да яе завялі крымінальную справу. Абвінавачаная цалкам прызнала віну, раскаялася ў зробленым і выбачылася перад пацярпелай.
Тым не менш жанчыну аштрафавалі на 70 базавых велічынь (2 800 рублёў). Акрамя таго, абвінавачаная павінна выплаціць пацярпелай 100 рублёў у якасці кампенсацыі прычыненай маральнай шкоды.
Каментары