Старшыня СААЗ не можа пакінуць Емен праз ізраільскія авіяўдары. Адзін з іх ледзь не трапіў па ім самім
Старшыня Сусветнай арганізацыі аховы здароўя (СААЗ) Тэдрас Гебрэесус разам з дэлегацыяй знаходзіўся ў аэрапорце падкантрольнага хусітам еменскага аэрапорта Саны, калі той падвергнуўся паветранай бамбардзіроўцы Ізраіля. Інфраструктура аэрапорта разбураная, а адзін з членаў экіпажа самалёта СААЗ паранены, паведаміў Гебрэесус.
«Мы збіраліся пачаць пасадку на авіярэйс з Саны [сталіца падкантрольнай праіранскім хусітам часткі Емена], калі аэрапорт падвергся паветранай бамбардзіроўцы. Адзін з членаў экіпажа нашага самалёта быў паранены, а ў самім аэрапорце загінулі два чалавекі. Дыспетчарская вежа, зала чакання вылету — усяго за некалькі метраў ад нас — і ўзлётная паласа пашкоджаныя», — напісаў генеральны дырэктар СААЗ Тэдрас Гебрэесус у сваім акаўнце ў твітары (X), перадае Руская служба Бі-бі-сі.
Як вынікае з заявы Гебрэесуса, ён не пацярпеў, разам з калегамі з СААЗ і ААН яны знаходзяцца ў бяспецы, але не змогуць пакінуць Емен, пакуль пашкоджанні ў аэрапорце не будуць ліквідаваныя.
Ізраільскія афіцыйныя асобы заявілі, што ўдары былі нанесеныя ягонымі знішчальнікамі па аэрапорце ў Сане, дзвюм электрастанцыям і тром марскім портам — усё гэта, паводле ізраільскага камандавання, з'яўляецца «вайсковай інфраструктурай хусітаў».
У апошнія дні Ізраіль папярэджваў, што рыхтуе магутны ўдар па хусіцкай частцы Емена ў адказ на нядаўні абстрэл групоўкай ізраільскіх гарадоў ракетамі і беспілотнікамі, у выніку якога былі параненыя больш за дзясятак чалавек. Міністэрства абароны Ізраіля папярэдзіла, што мае намер «адсячы кіраўніцтва групоўкі».
Хусіты — гэта радыкальная шыіцкая ўзброеная палітычная і рэлігійная групоўка, якую падтрымлівае Іран. У 2015 годзе групоўка ўзяла пад свой кантроль значную частку заходняга Емена, дзе знаходзіцца і сталіца краіны, горад Сана. Хусіты неаднаразова атакавалі Ізраіль ракетамі і дронамі-камікадзэ з першых месяцаў вайны ў сектары Газа, якая пачалася пасля маштабнага нападу ХАМАС 7 кастрычніка 2023 года.
Цяпер чытаюць
Брат беларускай каралевы прыгажосці трапіў у рэанімацыю ў Азербайджане2
Каментары