Магілёў: Рэкляма беларускамоўнай групы з забаўляльнай інфармацыяй
Рэкляма адзінай у Магілёве беларускамоўнай групы зьявілася на старонках газэты Магілёўскага гарвыканкаму “Веснік Магілёва”. Нататку пра групу “Дзецям у падарунак матчына мова” журналісты дзяржаўнага выданьня разьмясьцілі на апошняй шаснаццатай старонцы ў рубрыцы “Под занавес”. Побач зь рэклямнай нататкай прыватныя абвесткі, крыжаванкі, показкі ды гараскоп.
Ініцыятары стварэньня групы ўдзячныя аўтарцы за яе нататку, аднак яны не задаволеныя такой рэклямай, бо лічаць яе неэфэктыўнай:
“Па першае газэта мае невялікі наклад. Газэта хутчэй за ўсё была выбраная таму, што мае падпарадкаваньне Магілёўскаму гарвыканкаму. Газэта ня вельмі папулярная ў горадзе. Чытаецца яна ў асноўным чыноўнікамі й служыць для таго, каб прадэманстраваць, што нейкая работа праводзіцца. У прынцыпе гэтую нататку можна лічыць такой своеасаблівай адпіскай. Людзі, якія адказныя за папулярызацыю ідэі беларускай групы, хутчэй за ўсё плянуюць спусьціць на такіх тармазах усю справу адпіскамі й падобнага кшталту матэрыяламі”, зазначыў адзін з ініцыятараў стварэньня групы Аляксей Бацюкоў.
Бацькі дзяцей, якія ходзяць у групу адмаўляцца ад яе не зьбіраюцца. Неўзабаве яны зьбяруцца разам, каб вырашыць далейшыя свае крокі ў рэклямаваньні групы.
12 сакавіка начальнік аддзелу адукацыі Ленінскага раёну Аляксандар Гапееў казаў, што адзіную ў Магілёве беларускамоўную групу могуць зачыніць, калі ў ёй да канца году ня будзе васьмі — дзесяці чалавек самамала.
У беларускамоўную групу “Вясёлка” пры дзіцячым садку №81 дзяцей пачалі вадзіць ад 3 сьнежня. Цяпер у групе чацьвёра дзяцей.
Беларускамоўная група зьявілася ў Магілёве пасьля амаль пятнаццацігадовага перапынку.
Каб не плаціць падатак на сабак, мінчукі пачалі здаваць іх у пункты адлову25
Каментары