Сіроты змогуць атрымаць ільготныя крэдыты на жыллё па-за чаргой, паведаміла сёння кансультант упраўлення жыллёвай палітыкі Міністэрства архітэктуры і будаўніцтва Іна Пінкоўская на прэс-канферэнцыі ў БЕЛТА, каментуючы новаўвядзенні ўказа нумар 460.
«Указам нумар 460 пашырана права дзяцей-сірот на атрыманне льготных крэдытаў на будаўніцтва, рэканструкцыю або набыццё жылля. Раней дзеці-сіроты таксама маглі атрымаць такі крэдыт, але дзяржпадтрымка прадастаўлялася ў парадку агульнай чарговасці. З 1 сакавіка яны будуць мець права атрымліваць ільготныя крэдыты і субсідыі ў пазачарговым парадку», — растлумачыла Іна Пінкоўская.
Ільготны крэдыт сіротам будзе прадастаўляцца на 40 гадоў пад 1 працэнт. Сацыяльнае жыллё яны будуць атрымліваць на 5 гадоў. Пасля заканчэння гэтага тэрміну можна застацца жыць у кватэры, але яна будзе пераведзена ў катэгорыю арэнднага жылля.
Акрамя таго, з уступленнем у сілу ўказа права на першачарговае крэдытаванне пазбаўляюцца грамадзяне, якія пражылі ў інтэрнатах больш за 10 гадоў.
Як растлумачыла начальнік аддзела юрыдычнай работы і кадраў Міністэрства жыллёва-камунальнай гаспадаркі Наталля Кухарчык, указам нумар 460 таксама прадугледжана магчымасць пераводзіць інтэрнаты ў арэнднае жыллё, якое можна будзе прыватызаваць. Пры гэтым права на прыватызацыю будуць мець не ўсе катэгорыі грамадзян.
Для першачаргавікоў (грамадзян, якія атрымалі жыллё на перыяд працаўладкавання — маладых спецыялістаў, ваеннаслужачых, суддзяў і інш.) паніжаючы каэфіцыент на арэнднае жыллё з 1 сакавіка будзе прымяняцца толькі да 20 кв.м жылля ў разліку на члена сям'і. Калі ва ўласнасці ў першачаргавіка з'явіцца іншае жыллё, то ён будзе выселены з арэнднай кватэры.
Яшчэ адно змяненне звязана з парадкам акумулявання сродкаў, якія паступаюць у якасці платы за арэнднае жыллё. Аблвыканкамы і Мінгарвыканкам будуць збіраць гэтыя сродкі на сваіх рахунках і самастойна імі распараджацца.
З 1 сакавіка ўступае ў сілу ўказ нумар 460, якім прадугледжваецца змяненне асобных норм у жыллёвым будаўніцтве. Асноўныя навацыі звязаны з карэкціроўкай указа нумар 13 і накіраваны на ўрэгуляванне шэрага пытанняў, што датычацца льготнага крэдытавання грамадзян, якія будуюць (рэканструююць) або набываюць жылыя памяшканні.
Брэндавая сумачка за $4 тысячы і брыльянты. Віцэ-міс Беларусі Алія Кароткая схадзіла з сяброўкай паесці дранікаў7
Брэндавая сумачка за $4 тысячы і брыльянты. Віцэ-міс Беларусі Алія Кароткая схадзіла з сяброўкай паесці дранікаў
На Афоне адшукалі тры невядомыя раней асобнікі Астрожскай Бібліі. Для яе стварэння друкар Іван Фёдараў, выхадзец з Беларусі, выкарыстоўваў тэксты Скарыны66
Каментары