Прадстаўнiк Беларусi на «Славянскiм базары» прапануе беларусам абраць песню калектыўна
Аляксей Грос, які сёлета мае рэпрэзентаваць Беларусь на «Славянскім базары», хоча, каб песню беларусы яму выбралі калектыўна.
На «Базары» спевакі выконваюць адзін «сусветны хіт» і адну «песню на славянскай мове».
У якасці сусветнага хіта Грос будзе спяваць «A Song for You» — песню Леона Расэла, якую раней перапявала Крысціна Агілера.
Што да песні на славянскай мове, то спявак і ягоны прадзюсар абяцаюць прыслухацца да меркавання людзей.
«Мы вырашылі не перапяваць усім знаёмыя песні, а прапануем беларусам даслаць нам не абавязкова гатовую песню, а, магчыма, вершы Янкі Купалы ці Якуба Коласа, а музыку мы напішам», — заявілі менеджары Гроса.
Музычным прадзюсарам спевака стаў Леанід Шырын, які працаваў раней з Ірынай Дарафеевай, Русланам Аляхно, Аляксеем і Андрэем Хлястовымі, Ларысай Грыбалёвай, Аляксандрам Саладухам.
Аляксею Гросу 26 гадоў, ён родам з Салігорска. У 2012-м прайшоў кастынг у прадзюсарскі цэнтр «Спамаш», з ім дагэтуль і працуе.
Акрамя «Славянскага базару», спявак тройчы выходзіў у фінал беларускага адбору на Еўрабачанне.
«Славянскі базар у Віцебску» сёлета пройдзе 25-ы раз.
Свае прапановы можаце дасылаць на мэйл спевака — [email protected]
Каментары