«Фанаты стаялі ў чэргах яшчэ да адкрыцця рэстаранаў». Шаленства з бірулькамі фей на сумкі, якія выпусціла піцэрыя
На «Куфары» танную біжутэрыю ўжо перапрадаюць — цэны даходзяць да 500 рублёў.
Пачалася гісторыя з таго, што «Дадо піца» і анімацыйная франшыза Winx Club вырашылі зрабіць калабарацыю з нагоды таго, што сёлета папулярны дзявочы мультфільм будуць перазапускаць.
У розных краінах, дзе працуе сетка піцэрый, паабяцалі тэматычнае меню. У яго ўвайшлі піца «Энчантыкс» з каляровымі сырнымі шарыкамі і бруснічным соусам, малочны кактэйль са смакам маліны і драганфрута ў яркай шклянцы з крыламі феі. Але галоўная фішка — абвесы (бірулькі) на сумкі ў колерах адной з гераінь мульціка.
Да Беларусі вінксаманія дайшла 6 ліпеня. За піцу трэба было заплаціць каля 32 рублёў і яшчэ амаль 15 рублёў за напой.
Цяпер беларускі дзеляцца ў сацсетках расчараваннем. Маўляў, чакалі акцыю некалькі тыдняў, а купіць тэматычны набор не атрымалася.
Так, жыхарка Брэста скардзіцца, што прыйшла ў піцэрыю праз паўтары гадзіны пасля яе адкрыцця, але ўсе сэты ўжо скончыліся. Дарэчы, прадстаўнікі кампаніі ў Беларусі адрэагавалі на скаргу: «Калабарацыя была лімітаванай — гэта прадугледжвае вельмі абмежаваную колькасць тавару. Фанаты ўчора стаялі ў чэргах яшчэ да адкрыцця рэстаранаў, таму ўсё было раскуплена ў першыя гадзіны працы пунктаў».
Самыя хітрыя прыхільніцы Вінкс зрабілі перадзамовы — але спрацаваў лайфхак не ва ўсіх. Людзі пішуць, што некаторыя замовы былі ануляваныя — грошы, канечне, вярнуць, але ж фанаткі хочуць абвесы фей, а не рублі на картку.
«Дадо піца» прызнае, што такія сітуацыі сапраўды здараліся, але не праз злы намер, а праз блытаніну ў некаторых рэстаранах.
Нехта нават гатовы ехаць у іншы горад, дзе яшчэ застаўся той сэт.
Дарэчы, тытул найлепшага хлопца было не вельмі складана атрымаць: адна з беларусак ажно плакала ад шчасця, калі пасля працы знайшла дома набор Вінкс, які набыў яе каханы.
Абураныя фанаткі, якія засталіся без падарункаў, патрабуюць зрабіць дадатковы тыраж — але пакуль што яго выпускаць не плануюць.
Тыя, каму пашанцавала ўсё ж атрымаць сэт, дзеляцца на тры катэгорыі. Першыя выхваляюцца ім: «Фінансавая адукаванасць: гэта былі апошнія грошы, да зарплаты больш за тыдзень».
Другія абураюцца тым, што ў Беларусі ўсё каштавала нават даражэй, чым у Расіі (там сэт прадавалі прыблізна за 35 беларускіх рублёў). Ды і смак піцы і напою спадабаўся не кожнай.
Ну а трэція спрабуюць перапрадаць абвесы фей. На «Куфары» цэны пачынаюцца ад 50 рублёў (гэта даражэй, чым каштаваў увесь сэт цалкам) і даходзяць ажно да 500 рублёў.
«Беларусы як з ланцуга сарваліся». У краіне пачалі перапрадаваць цацкі з «Кідс Міла»
Хакейны клуб «Дынама-Мінск» правёў «жаночы матч» з падарункамі — і давеў заўзятарак да шаленства
«Купі торбу і расказвай усім, што быў у Парыжы!» На «Куфары» прадаюць промапрадукцыю Алімпіяды
150 рублёў за каробку «Луі Вітон»: як беларусы спрабуюць зарабіць на продажы ўпакоўкі люксавых брэндаў
Каментары