Ксенія Сабчак у Мінску: Лукашэнка сімпатычны мне як чалавек, але я не згодная з яго недэмакратычнай палітыкай

На сустрэчу з Ксеніяй Сабчак чаргі па квіткі не было, але людзей прыйшло нямала. У асноўным жанчыны і маладыя дзяўчаты, значна меней мужчын. Наўрад ці ўсе яны мелі на мэце нечаму навучыцца, хутчэй – паглядзець на неадназначную і вядомую персону. Імпрэза называлася «Сабчак – гэта брэнд» і паводле анонсу абяцала навучыць, як пабудаваць стратэгію ўласнага развіцця.

Павялічыць

Некалі яна ўбачыла праграму «Поле цудаў», якую на той момант ужо гадоў дваццаць вёў Леанід Якубовіч. Прачытаўшы ў яго вачах страшэнную стому ад бабулек і іхніх хатніх кансерваў, Ксенія Сабчак зразумела, што больш не хоча быць зоркай «Дома-2». Сустрэчу ў Мінску Ксенія пабудавала на тым, што

самае важнае для стварэння ўласнага брэнду і для шчаслівага жыцця ўвогуле – гэта займацца і развівацца ў той справе, якая падабаецца больш за ўсё.

«Галоўнае ­­— вызначыць, што падабаецца больш за ўсё. Гэта можа быць вельмі дзіўная рэч, адказ заўсёды схаваны. Больш за ўсё вам падабаецца хадзіць па крамах і вы можаце рабіць гэта ўвесь дзень? Падумайце, ці не стаць вам стылістам ці баерам [cпецыялістам па закупках ў крамах моднай вопраткі і абутку]. Любіце глядзець спартовыя праграмы? Тады, можа, ваша справа – спартовае каментаванне.

Не трэба рабіць тое, што не падабаецца, ні для якога статусу. Поспеху не будзе: ён прыходзіць тады, калі робіш тое, што любіш.

Мне больш за ўсё падабаецца працаваць з людзьмі, капацца ў іх, таму я займаюся журналістыкай».

Вядучая адзначыла, што поспех не мае залежнасці ад першапачатковага старту, і прывяла як прыклад сябе. З яе словаў, дзеці вядомых ці багатых бацькоў зусім не абавязкова дасягаюць поспеху. Часцей наадварот: той, хто на старце мае менш, у выніку атрымлівае больш: «Канкурэнцыя ёсць на любых узроўнях. У маім асяроддзі таксама хапае складанасцяў.

Цяжка, калі бацькі заўсёды большыя за дзіця: больш вядомыя, больш значныя, больш паважаныя. Гэта не меншая праблема, чым бацькі-алкаголікі.

Большасць сяброў майго дзяцінства не дасягнулі ў жыцці нічога ці апынуліся ўнізе».

Таксама поспех не звязаны з узроўнем аплаты: тыя, хто сапраўды любіць сваю работу, робіць яе добра за любыя грошы і ў любым выпадку праяўляе ініцыятыву. Гэта абавязкова дасць вынік: добрую работу заўсёды заўважаюць, нават калі здаецца, што гэта не так.

Са словаў Ксеніі Сабчак, якая мае некалькі кірункаў уласнага бізнэсу, самы вялікі дэфіцыт нашага часу – у актыўных мэтаскіраваных людзях, іх увесь час шукаюць і раней ці пазней знаходзяць.

Былая «свецкая львіца» засцерагла ад таго, каб імкнуцца да вядомасці без нейкіх заняткаў, калі вядомасць – каштоўнасць сама па сабе, зазначыўшы, што сама некалі трапіла ў гэтую пастку. Не трэба думаць, казала Сабчак, што ты зорка, і ўсё гэтаму падпарадкуецца. «Калі ёсць разуменне, у чым твая каштоўнасць і што ты можаш даць свету – толькі тады свет пачынае даваць табе».

Да якасцяў, якія засталіся нам з савецкіх часоў і ад якіх варта пазбавіцца, былі аднесены сціпласць і імкненне да абавязковай вышэйшай адукацыі. Таксама Ксенія заклікае не баяцца адмовы: перамагаюць тыя, хто працягвае ісці пасля падзення. «Адмова — гэта не значыць, што цяпер крызіс і немагчыма знайсці добрую працу (грошы, людзей і г.д.) Адмова — гэта значыць, што вам адмовілі, і толькі».

Пры канцы сустрэчы Ксенія Сабчак адказвала на пытанні з залы. На пытанне пра асабістае стаўленне да Аляксандра Лукашэнкі Сабчак адказала, што ён харызматычны, эмацыйны, і разам з тым прафесійна дае інтэрв’ю. Вельмі сімпатычны ёй як чалавек, але яна не згодная з несправядлівай і недэмакратычнай палітыкай, якую той праводзіць, зрэшты, як і з палітыкай Пуціна. Пры гэтым Ксенія сумна пажартавала, што народ і ў Беларусі, і ў Расіі вельмі цярплівы, таму ёй падаецца, што тое, што адбываецца ў нашых краінах — надоўга.

• 0
• 0
• 0
• 0
• 0
• 0
• 0
• 0