Алімпійскі медаліст Міхневіч: «Бізнэс-ідэй у мяне не было, таму вырашыў аддаць чамадан з $440 тысячамі Япрынцаву-малодшаму»
У Цэнтральным судзе Мінска працягваецца суд над Уладзімірам і Казбекам Япрынцавымі, якіх абвінавачваюць у махлярства, здзейсненым арганізаванай групай альбо ў асабліва буйным памеры.
Пачаўся допыт другога пацярпелага — Андрэя Міхневіча, галоўнага спецыяліста па спартыўна-аздараўленчым мерапрыемствам у кампаніі «Віталюр».
Міхневіч — у мінулым вядомы лёгкаатлет, бронзавы прызёр летніх Алімпійскіх гульняў 2008 года ў штурханні ядра. У 2013 годзе быў дыскваліфікаваны пажыццёва за ўжыванне допінгу.
Па словах Міхневіча, з Казбекам Япрынцавым ён пазнаёміўся ў 2014 годзе. У іх быў агульны таварыш — Дзмітрый Нікулін, які разам вучыўся з Казбекам. «Яго ён характарызаваў як чалавека ў меру распушчанага, але які ўжо прыйшоў да таго, што трымае сваё слова», — растлумачыў пацярпелы.
Да таго часу Андрэй Міхневіч ўжо сышоў з спорту, быў беспрацоўным. «Так бывае. Калі спартсмены сканчаюць кар'еру, яны нікому не патрэбныя, — растлумачыў ён у судзе. — Прозвішча Япрынцава значыла многае для мяне. Я меркаваў праз Казбека пазнаёміцца з яго бацькам і працаваць на яго».
Япрынцава-старэйшага пацярпелы характарызуе станоўча. Кажа, ён дапамагаў многім спартсменам.
За спартыўную кар'еру Андрэй Міхневіч адклаў каля $500 тысяч і быў гатовы ўкласці гэтыя грошы ў бізнэс. Але сваіх ідэй у яго не было, таму вырашыў проста аддаць сродкі Япрынцава-малодшаму.
$365 тысяч ён прывёз у чамадане у офіс «Трайпла» і перадаў асабіста ў рукі Казбеку. Дагавор аб пазыцы на месцы не афармлялі, на словах вырашылі, што доўг бізнэсмэн верне Міхневічу праз паўгода. Потым яшчэ перадаў $75 тысяч.
«У мяне быў вар'яцкі давер, — растлумачыў ён. — На што пайшлі грошы, я не ведаю. Для мяне гэта значэння не мела».
«Паняцце грошы для мяне абстрактнае. Калі яны ёсць, гэта напружвае. Нават цяпер жонка больш перажывае, трэцяе дзіця трэба падымаць», — заявіў Міхневіч.
Яго жонка — вядомая спартсменка Наталля Міхневіч, сярэбраная прызёрка Алімпійскіх гульняў 2008 года ў Пекіне.
Пазней дамову аб пазыцы Міхневіч з Япрынцавым-малодшым усё ж аформілі, агульная сума склала $440 тысяч.
«Пасля затрымання Казбека я зразумеў, што жыву ў іншым свеце. Чакаў. Спадзяваўся, што ўсё хутка скончыцца, — заявіў Міхневіч. — Потым мяне выклікалі ў КДБ. Паказалі канфіскаваную ў Казбека дамову пра маю пазыку, спыталі, ці буду я пісаць заяву. Я сказаў, што падумаю».
Хвалявацца за свае грошы Міхневіч пачаў у снежні 2015 года (Япрынцавы, нагадаем, былі затрыманыя ў жніўні). Вырашыў звярнуцца за парадай да Юрыя Чыжа, з якім раней сустракаўся на прэзідэнцкіх суботніках.
«Я ж не ведаў тады, што ён быў ініцыятарам усяго гэтага! Юрый Аляксандравіч спытаў, якая сума, сказаў: «Ай-яй-яй» і параіў пісаць заяву ў КДБ. Ну, я і пайшоў», — патлумачыў Андрэй Міхневіч.
Чыж, па яго словах, параіў звярнуцца менавіта ў КДБ, а не ў суд — так больш шанцаў вярнуць грошы.
Пацярпелы шкадуе, што звярнуўся ў КДБ па парадзе Чыжа. Ён да гэтага часу ўпэўнены, што Япрынцаў верне яму доўг.
У судзе абвешчаны перапынак. У другой палове дня — вывучэнне пісьмовых матэрыялаў справы.
Цяпер чытаюць
«Толькі тры чалавекі будуць ведаць пра вас. Самы першы чалавек краіны». З'явіліся запісы размоў шпіёнкі Іны Кардаш з куратарам23
«Толькі тры чалавекі будуць ведаць пра вас. Самы першы чалавек краіны». З'явіліся запісы размоў шпіёнкі Іны Кардаш з куратарам
«Лукашэнка павінен панесці адказнасць за саўдзел у расійскай агрэсіі». Міністр замежных спраў Украіны расказаў пра новую палітыку ў дачыненні да Беларусі2424
Каментары