На аўстралійскім востраве здолелі вынішчыць усіх мышэй і пацукоў. Прырода пачала аднаўляцца
Востраў Лорд-Хаў знаходзіцца прыкладна за 600 км ад усходняга ўзбярэжжа Аўстраліі. Гэта невялікі востраў вулканічнага паходжання з унікальнай прыродай — там шмат рэдкіх раслін і жывёл, многія з якіх не сустракаюцца больш нідзе ў свеце, піша The Guardian.
Раней экасістэма вострава моцна пацярпела з-за пацукоў і мышэй, якіх завезлі людзі. Яны з’явіліся яшчэ ў XIX стагоддзі і пачалі знішчаць усё: расліны, насенне, насякомых і нават птушыныя яйкі. У выніку зніклі некалькі відаў птушак, раслін і як мінімум 13 відаў беспазваночных.
У 2019 годзе на востраве правялі вялікую праграму па знішчэнні грызуноў — усяго іх было каля 300 тысяч. Да гэтага вучоныя вывучылі стан прыроды, каб потым параўнаць змены.
Праз некалькі гадоў стала відаць, што прырода пачала аднаўляцца. Колькасць насякомых — жукоў, даўганосікаў, тараканаў і іншых — вырасла прыкладна на 60%. Вучоныя кажуць, што вынікі нават лепшыя, чым чакалася.
На востраве цяпер вядома больш за 1600 відаў беспазваночных, і каля паловы з іх унікальныя. Некаторыя віды, якія лічыліся зніклымі, зноў з'явіліся. Напрыклад, рэдкія віды насякомых, якіх не бачылі больш за 100 гадоў.
Аднаўленне насякомых важнае для ўсёй экасістэмы. Пасля знікнення грызуноў у птушак і рэптылій з’явілася больш ежы, пачалі аднаўляцца лясы — зноў растуць маладыя расліны, бо іх больш не знішчаюць пацукі і мышы.
Навукоўцы лічаць, што гэта толькі пачатак. З часам на востраве стане яшчэ больш птушак, яшчарак і іншых жывёл, а экасістэма будзе і далей аднаўляцца.
Самая маленькая незалежная рэспубліка ў свеце збіраецца праз рэферэндум змяніць назву
У Аўстраліі чалавек загінуў пасля нападу акулы
Гіганцкіх чарапах выпусцілі на ціхаакіянскі востраў праз 180 гадоў адсутнасці на ім
80‑гадовую пасажырку круізнага судна забыліся на трапічным востраве. Гэта скончылася для яе трагічна
Каментары
Завезлі б пару катоў туды.