Улады Ірландыі перагледзелі ацэнку па росце ВУП краіны за 2015 год. Новыя дадзеныя адрозніваюцца ад ранейшых у 3 разы. Выхад эканомікі Ірландыі на такія паказчыкі звязваюць з пераносам у гэтую краіну штаб-кватэр буйных карпарацый.
За 2016 год ВУП Ірландыі вырас на 26,3%, паведамляе Цэнтральнае ўпраўленне статыстыкі (ЦУС) гэтай краіны. Па абноўленых звестках ведамства, у 2015 годзе аб'ём ВУП Ірландыі склаў €243,914 млрд (у цэнах 2014 году) супраць €193,16 млрд годам раней.
Раней лічылася, што за ўвесь 2015 год эканоміка Ірландыі вырасла толькі на 7,8%, што таксама было лепшым паказчыкам сярод краін ЕС.
Прырост ВУП краін еўразоны, да прыкладу, склаў толькі 1,6%.
У справаздачы ведамства адзначаецца, што найбольш істотны ўклад у рост ВУП зрабілі прамысловасць і будаўнічая сфера. Вартасны аб'ём іх вытворчасці, па дадзеных ЦУС, у 2015 годзе вырас на 87,3% — з € 46,525 млрд да € 87,144 млрд. У астатніх сектарах эканомікі Ірландыі прырост апынуўся ў разы сціплейшым. Так, напрыклад, паказчыкі сельскай гаспадаркі палепшыліся толькі на 10,3% (да € 4,585 млрд).
Эксперты звязваюць рэзкі рост ВУП Ірландыі з пераносам у гэтую краіну штаб-кватэр буйных міжнародных карпарацый, прыцягнутых нізкімі стаўкамі падатку на прыбытак. Калі штаб-кватэра буйной групы кампаній атрымлівае статус рэзідэнта, увесь прыбытак такой групы ўключаецца ў валавы нацыянальны даход.
«Мы вельмі маленькая эканоміка, і вось што здараецца, калі мы атрымліваем вялікае павелічэнне актываў», - растлумачыў Bloomberg прадстаўнік ЦУС Майкл Коналі.
У паведамленні ірландскага Мінфіна адзначаецца, што новыя дадзеныя аб росце ВУП палепшаць і іншыя макраэканамічныя паказчыкі Ірландыі. У прыватнасці, дэфіцыт бюджэту скароціцца да 1,9% ВУП, а ўзровень дзярждоўгу — да 79% ВУП.
Прырост ВУП Ірландыі аказаўся самым высокім з зафіксаваных у 2015 годзе ва ўсім свеце. Па дадзеных Міжнароднага валютнага фонду (МВФ), большы чым 10-працэнтны прырост эканомікі ў мінулым годзе паказала толькі Эфіопія (+ 10,2%), а ВУП Палаў і Папуа Новай Гвінеі выраслі на 9,4 і 9% адпаведна.
Пры гэтым ВУП ЗША ў 2015 годзе вырас на 2,4%, Германіі - на 1,5%, Вялікабрытаніі - на 2,2%, Японіі - на 0,5%, Кітая - на 6,9%, а ВУП Беларусі знізіўся на 3,9% да 869,7 трлн недэнамінаваных рублёў (каля 42,8 млрд еўра па стане на 1 студзеня 2016).
Цяпер чытаюць
«Мае спінагрызы са мной». Ціханоўская расказала, што ўжо выбірае для дзяцей школу ў Варшаве12
Каментары