Таццяна Караткевіч сабрала 1400 подпісаў і падала дакументы на рэгістрацыю кандыдатам у дэпутаты
Сустаршыня кампаніі «Гавары праўду» Таццяна Караткевіч 29 ліпеня падала дакументы на рэгістрацыю кандыдатам у дэпутаты па Кастрычніцкай акрузе № 97 Мінска. «Тры тыдні я і мая каманда збіралі подпісы: хадзілі па кватэрах, стаялі ў пікетах. У выніку сабралі 1.400 подпісаў», — паведаміла яна.
Караткевіч спадзяецца, што яе зарэгіструюць і яна зможа «яшчэ больш людзей азнаёміць з праграмай «Гавары праўду», яе бачаннем будучыні». «Многія людзі, якія падыходзяць да мяне, кажуць мне, каб я ішла наперад, жадаюць поспеху», — сказала палітык.
Караткевіч адзначыла, што астатнія прэтэндэнты ў дэпутаты ад «Гавары праўду» будуць падаваць дакументы на рэгістрацыю кандыдатамі ў дэпутаты 1 жніўня. «Амаль усе прэтэндэнты ўжо сабралі неабходную колькасць подпісаў. Усе нашы кандыдаты вылучаюцца шляхам збору подпісаў. Мы працуем па максімуме, каб нас бачылі, мы былі прыкметнымі, даступнымі і зразумелымі выбаршчыкам», — падкрэсліла яна.
Якіх-небудзь прэтэнзій з боку акруговай камісіі да яе ініцыятыўнай групы не было, заўважыла Караткевіч.
Як паведамлялася раней, у спісе прэтэндэнтаў на месца ў парламенце ад «Гавары праўду» 29 чалавек. Вылучаецца таксама яшчэ адзін сустаршыня кампаніі Андрэй Дзмітрыеў.
З 29 прэтэндэнтаў толькі пяцёра маюць вопыт удзелу ў парламенцкіх выбарах у якасці кандыдатаў у дэпутаты, дзве траціны — увогуле не мелі дачынення да актыўнай палітыкі.
Прэтэндэнты ад «Гавары праўду» выступаюць на парламенцкіх выбарах з агульнай стратэгіяй мірных перамен і адзіным пасланнем да выбаршчыкаў.
Караткевіч ўдзельнічала ў выбарах 2015 года ў якасці кандыдата ў прэзідэнты.
Цяпер чытаюць
Блогер Сярога з Расіі прыехаў на Зыбіцкую з каханай блогеркай Анечкай. Вынік: збіты ім беларус у коме, а Сярога на 5,5 года за кратамі24
Каментары