7 лістапада ў Беларусі святочны дзень — адзначаюцца ўгодкі рэвалюцыі (па іншай версіі — перавароту) ў расійскім Петраградзе. Партыя бальшавікоў на чале з Уладзімірам Ульянавым-Леніным захапіла ўладу ў расійскай сталіцы, а ў выніку грамадзянскай вайны — і ва ўсёй Расіі.
Еўрарадыё пагартала беларускую газету «Homan» («Гоман»), якая ў той час выдавалася ў Вільні ды падрабязна асвятляла падзеі ў Петраградзе (Пецярбургу). На пачатку лістапада 1917-га выданне паведамляла пра хваляванні вайскоўцаў у расійскай сталіцы. А ў нумары ад 9 лістапада «Гоман» змяшчае падборку навінаў. Улады планавалі ўзарваць у горадзе масты «між рабочымі кварталамі і цэнтрам места (горада — Еўрарадыё)».
«Керанскі (прэм'ер часовага расійскага ўраду — Еўрарадыё) сказаў, што бальшавікі маняцца (збіраюцца — Еўрарадыё) захапіць у свае рукі ўласць і вызваць грамадскую вайну. Гэтым яны адкрываюць немцам фронт», — пісаў «Гоман». Як вядома, падзеі ў Петраградзе адбываліся ў той час, калі працягвалася Першая сусветная вайна. Расійска-нямецкі фронт праходзіў і праз Беларусь.
Звесткі пра падзеі ў Петраградзе віленская рэдакцыя атрымлівала таксама са Стакгольма і Капенгагена. Са сталіцы Даніі паведамлялі, што ў сталіцы Расіі «ўзнялася грамадская вайна». «Шмат на якіх вуліцах пабудаваны барыкады. Узняліся бітвы між народам і войскам. У работніцкіх кварталах пануе анархія. Бальшавіцкі рух пашыраецца. Рада міністраў пад маршалкоўствам (старшынствам — Еўрарадыё) Керанскага засядала ўсю ноч у Зімовым палацы, навокал якога пастаўлены гарматы», — чытаем у «Гомане».
Цікавае паведамленне перадала агенцтва Reuters: «Атрад марской пяхоты пад камандай камітэту бальшавікоў заняў гмах (будынак — Еўрарадыё) пецярбургскага тэлеграфнага агенцтва, цэнтральны тэлеграф, дзяржаўны банк і марское міністэрства, дзе засядала рада рэспублікі, якая разыйшлася».
У наступных нумарах «Гоман» таксама пісаў пра падзеі ў Пецярбургу, як пра «рэвалюцыю». Галоўнымі героямі навінаў сталі Ленін і Троцкі.
Цяпер чытаюць
Мінчанка Ангеліна, якая выпрасіла ў Лукашэнкі кватэру за трайнят, упершыню паказала той падарунак16
Мінчанка Ангеліна, якая выпрасіла ў Лукашэнкі кватэру за трайнят, упершыню паказала той падарунак
«Чаму мы павінны неяк ушчэмліваць сябе?». Дырэктарка РТБД патлумачыла, чаму паставіла спектакль паводле Пушкіна ў адным з апошніх тэатраў краіны, які працаваў па-беларуску6060
Каментары