Літва знізіла ўзровень фізічнай аховы Святланы Ціханоўскай

Літва змяншае ўзровень фізічнай аховы Святланы Ціханоўскай. Пра гэта парталу LRT.lt пацвердзіў міністр замежных спраў Кястуціс Будрыс.

З моманту прыезду С. Ціханоўскай у Літву пасля прэзідэнцкіх выбараў 2020 года ў Беларусі краіна надала прадстаўніцтву беларускай дэмакратыі афіцыйны статус, а самой апазіцыянерцы забяспечыла кругласутачную фізічную ахову як у Літве, так і за яе межамі.

Ціханоўскай быў прысвоены статус афіцыйнага госця катэгорыі C — такі статус звычайна надаецца паслам замежных дзяржаў, кіраўнікам прадстаўніцтваў міжнародных арганізацый, акрэдытаваных у Літве, членам замежных урадаў, членам Еўрапейскай камісіі і іншым асобам аналагічнага ўзроўню. Аднак дыпламатычнага статусу і, адпаведна, імунітэту яна не мае.

Паводле даных крыніц LRT.lt, ахова С. Ціханоўскай і суправаджальныя выдаткі абыходзіліся дзяржаве прыкладна 1 мільён еўра ў год. У гэтую суму ўваходзіла кругласутачная фізічная ахова ў Літве і за мяжой, аўтамабілі для суправаджэння, утрыманне месца пражывання, а таксама карыстанне VIP-терміналамі ў аэрапортах.

Міністэрства замежных спраў у адказ на запыт дэпутата Сейма Рымаса Янкунаса афіцыйна адзначыла, што пытанні бяспекі С. Ціханоўскай не ўваходзяць у яго кампетэнцыю. Аднак міністэрства аплачвае паслугі VIP-залаў для афіцыйных гасцей. У 2024 годзе выдаткі на VIP-терміналы для С. Ціханоўскай склалі 129 тыс. еўра, у 2023 годзе — 92 тыс. еўра.

Паводле наяўнай інфармацыі, ахова С. Ціханоўскай цалкам не здымаецца, але ўзровень фізічнай абароны зніжаецца: гарантаванне яе бяспекі перадаецца ад Службы аховы кіраўніцтва дзяржавы (VAD) Бюро крымінальнай паліцыі, якое забяспечвае абарону не на ўзроўні кіраўніка дзяржавы, а як асобы, якой можа пагражаць рэальная небяспека. Напрыклад, аналагічным чынам Бюро ахоўвае сведкаў і пацярпелых.

Хоць афіцыйных каментарыяў з гэтай нагоды няма, рашэнне пачалі рэалізоўваць з 1 кастрычніка, з пераходным перыядам да лістапада.

«Каб не падвяргаць небяспецы асобу, якая ахоўваецца, мы не можам публічна каментаваць гэтую тэму — ні пацвярджаць, ні абвяргаць інфармацыю пра ўзмацненне або аслабленне аховы. Прымяняльныя меры бяспекі з’яўляюцца сакрэтнай інфармацыяй», — заявіў першы намеснік дырэктара Службы аховы кіраўніцтва дзяржавы Паўлюс Неміра.

Да гэтага часу Святлану Ціханоўскую кругласутачна ахоўвалі супрацоўнікі гэтай службы, якая забяспечвае бяспеку ўсіх кіраўнікоў Літоўскай дзяржавы — прэзідэнта, старшыні Сейма і прэм’ер-міністра. Акрамя дзеючых службовых асоб, служба ахоўвае былых прэзідэнтаў, а таксама афіцыйных гасцей краіны.

У выпадку ўзнікнення пагрозы бяспецы Служба аховы кіраўніцтва таксама можа ахоўваць пару, партнёраў і дзяцей кіраўнікоў дзяржавы, генеральнага пракурора, дыпламатаў, дзейных і былых членаў Сейма, прэм’ераў, міністраў і іншых асоб. Рашэнне пра неабходнасць аховы іншых асоб звычайна прымае Урад або ўпаўнаважаны ім орган.

• 23
• 6
• 9
• 8
• 6
• 4
• 9
• 0