У вёсцы Міжрэчча Валожынскага раёна з падсобнага памяшкання стайні невядомы злачынца, скарыстаўшыся ключом, скраў даляры ЗША і рублі ў трох мінчан, якія займаюцца гістарычнай рэстаўрацыяй конных баталій.
Валожынскі раённы аддзел Следчага камітэта 1 снежня пачаў крымінальную справу. Следчы РАСК Сяргей Лапцік распавёў Край.бай: пацярпелыя ў фермерскай гаспадарцы «Ранча Залатая шпора» ўдзельнічаюць у конных выездах і рэстаўрацыі гістарычных падзей, звязаных з коньмі. Аднаму з іх 36 гадоў, другому — 30, трэцяму — 27.
Раніцай 26 лістапада мінчане ў падсобным памяшканні стайні пераапрануліся, пакінулі кашалькі, каштоўныя рэчы і паехалі на мерапрыемства ў Барысаўскі раён.
Вярнуліся ўвечары 27 лістапада і не знайшлі ў сваіх кашальках грошай. У аднаго пацярпелага зламыснік забраў 70 даляраў ЗША і 140 рублёў, у другога - 55 рублёў, у трэцяга - 50 рублёў.
Сяргей Лапцік адзначыў:
«Злодзей аказаўся высакародным чалавекам. З кашалькоў ён забраў не ўсе грошы, пакінуўшы кожнаму па 10 рублёў. Больш за тое, ён пакінуў на сваім месцы каштоўныя рэчы — мабільныя тэлефоны і гадзіннікі».
Крымінальная справа заведзена па першай частцы артыкула 205 «Крадзеж». Максімальнае пакаранне — тры гады пазбаўлення волі.
Каментары