Увечары 12 мая на вуліцы Магілёўскай у Мінску «Сітраэн» раптам вылецеў на тратуар, дзе збіў дзвюх студэнтак. Адна з іх загінула на месцы, другая памерла ў бальніцы. Кіроўца застаўся жывы.
Пасля аварыі Віктара Казлова, кіроўцу, пакінулі на волі. Ускладніў справу і факт, што 50-гадовы мужчына сцвярджаў, нібыта раптоўна страціў прытомнасць падчас руху. Але ж следства высветліла, што страта прытомнасці была адным з сімптомаў захворвання, ад якога пакутаваў Казлоў. Пра такія прыступы мужчына ведаў, аднак усё роўна працягваў ездзіць за стырном.
Згодна з вынікамі аўтатэхнічнай экспертызы, у дзень трагедыі ён рухаўся з хуткасцю не менш за 80 км/г. У момант руху наступіў чарговы раптоўны прыступ захворвання — што і прывяло да ДТЗ і смерці дзвюх студэнтак, 1995 і 1996 года нараджэння.
У выніку мужчыну прад’явілі абвінавачванне ў прычынені смерці па неасцярожнасці. 9 лістапада яго ўзялі пад варту. Казлову пагражае да 5 гадоў зняволення.
13 снежня суд Кастрычніцкага раёна пачаў разгляд справы.
Адвакат Казлова папрасіў зрабіць пасяджэнне закрытым — бо будзе абмяркоўвацца захворванне і псіхафізічны стан абвінавачанага, а гэта «інтымныя тэмы». Пракурор не пагадзіўся, пацярпелыя — сваякі загінулых — таксама. У выніку суд хадайніцтва адхіліў.
Яшчэ адно хадайніцтва адваката — аб змене меры стрымання і вызваленні Казлова з-пад варты — суд адхіліў таксама. Дарэчы, і пракурор, і пацярпелыя папрасілі пакінуць абвінавачанага пад вартай.
«Мы хочам, каб яго [Казлова] пакаралі па справядлівасці. Каб суд вынес справядлівае рашэнне», — пракаментавалі пасяджэнне двое маладых людзей. Гэта браты загінулых дзяўчат, яны праходзяць па справе ў якасці пацярпелых. Злосці ці жадання адпомсціць у іх няма. Але пакаранне павінна быць, лічаць яны. «Як суд вырашыць, так і будзе», — гавораць мужчыны.
У Казлова была гемангіома — пухліна ў сасудах, праз якую час ад часу ў яго здараліся прыступы эпілепсіі. Адзін з такіх і напаткаў яго 12 мая падчас руху па вуліцы Магілёўскай, заявіў пракурор.
Сам Казлоў запэўніў, што пра прыступы не ведаў, тым больш, што раней праходзіў лячэнне і нават перанёс аперацыю.
Сваю віну ён не прызнаў.
Цяпер чытаюць
«Пайшлі нах*й вы і ваш «Бацька», пі***асы!» П'яныя прыгоды зрабілі армяніна Ярванда палітвязнем. Цяпер ён змагаецца з праблемамі ў Польшчы11
Каментары