Судзяць графіціста Алега Ларычава: ён маляваў трафарэт, прысвечаны «Беламу легіёну»
Прысуд будзе агучаны 6 чэрвеня. Суддзя пакуль не здолеў прыняць рашэння.
Арт-менеджар і графіці-мастак Алег Ларычаў быў затрыманы ноччу з 3 на 4 чэрвеня на вуліцы Магілёўскай разам са сваёй дзяўчынай. Іх узялі пасля нанясення трафарэта.
«Нас вялі ад пад’езда. Затрымліваў АМАП — мы не паспелі адысці на 300 метраў, як нас скруцілі. Рэшту ночы правялі ў СІЗА, пасля — на Акрэсціна», — паведаміла дзяўчына Алега.
Пакуль што і Алег, і яго дзяўчына Ганна знаходзяцца ў РАУС Кастрычніцкага раёна.
Абвінавачваюць маладзёнаў у лаянцы матам і нанясенні графіці (то бок, шкодзе маёмасці).
***
Разглядаў справу суддзя Віталь Сямёнаў. Алега Ларычава і яго дзяўчыну Ганну Новік вінавацілі ў дробным хуліганстве. Усё стандартна: нібыта Алег і Ганна «гучна лаяліся матам у адрас мінакоў (у 2.40 ночы) і супрацоўнікоў міліцыі».
Сведкам, як звычайна, выступіў адзін з супрацоўнікаў міліцыі, якія затрымлівалі Алега і Ганну.
Па яго словах, у тую ноч ён працаваў у цывільнай форме. маладзёны паводзілі сябе падазрона, таму ён з калегам вырашылі «пахадзіць за імі, паглядзець». Пабачылі, як хлопец з дзяўчынай штосьці намалявалі на сцяне — і іх затрымалі. Падчас затрымання Алег з Ганнай лаяліся матам, запэўніў міліцыянт.
Што малявалі — невядома. «Там такі малюнак, што я не зразумеў, што намалявана», — прызнаўся міліцыянт.
Перад судом Ларычаў сказаў, што хацеў паспрабаць намаляваць трафарэт, прысвечаны «Беламу легіёну».
На малюнку павінен быў быць мужчына за кратамі. Але скончыць яго не паспелі.
ФОТАФАКТ: Графіці ў падтрымку «Белага легіёна», якое хацеў намаляваць Ларычаў
Ганна Новік аштрафаваная на 10 базавых (230 рублёў).
За дзве гадзіны суддзя так і не здолеў вырашыць, што рабіць з Ларычавым. Прысуд графіцісту будзе агучаны 6 чэрвеня ў 10.30. Пакуль што ён вызвалены.
***
Алег Ларычаў раней адсядзеў 5 сутак за нібыта «маханне рукамі і нецэнзурную лаянку», да таго Ларычава аштрафавалі на 1150 рублёў нібыта за дамалёўку калючага дроту на мурале «Масква-Мінск». На пачатку красавіка Ларычаў быў збіты невядомымі, нападнікаў дагэтуль не знайшлі. Сам Алег звязваў і збіццё, і затрыманні з графіці на «Сцяне Шчоткінай».
Цяпер чытаюць
Гістарычныя +40,4°C у Пінску — гэта толькі разагрэў. Беларусь уваходзіць у новую кліматычную эру і на вачах стане лесастэпам8
Каментары